Fréttir
Birtir til í Héðinsfjarðargöngum
Gömlum perum skipt út fyrir LED perur
Nýverið var skipt um perur í styttri Héðinsfjarðargöngum. Sú lýsing sem hefur verið þar hingað til er frá lágþrýstum natríum NaL perum sem gefa gula birtu. Hins vegar stendur til að hætta framleiðslu á slíkum perum og verða þær bannaðar í Evrópu og líklega víðar. Því var ákveðið að skipta þeim út til prufu á 3,9 kílómetra kafla í Héðinsfjarðargöngum og setja í stað þeirra LED perur sem gefa hvítari birtu sem þykir ákjósanlegri en gula birtan. Auk þess nýtir LED peran rafmagn enn betur.Í þetta sinn var skipt um 220 ljós. Það tók starfsmenn Vegagerðarinnar dágóðan tíma enda þarf að skipta um ákveðinn búnað í ljósinu til að hann henti LED perunni betur. Það tók fimm manna gengi eina klukkustund að skipta um 10 perur og verkið í heild tók því þrjá til fjóra daga.
Gísli Eiríksson forstöðumaður jarðganga hjá Vegagerðinni segir að væntanlega þurfi að skipta út öllum ljósum í göngum landsins þegar fram í sækir. LED ljós eru nú þegar í Norðfjarðargöngum og Vaðlaheiðargöngum.