Fréttir
Yfir 40 þúsund hraðabrot skráð með sjálfvirku hraðaeftirliti árið 2021
Hæsti hraði sem mældist með sjálfvirku hraðaeftirliti árið 2021 var 166 km/klst. Yfir fjörutíu þúsund hraðabrot voru skráð það ár og þar af um 19 þúsund á höfuðborgarsvæðinu. Átta nýjar meðalhraðamyndavélar voru teknar í notkun við árið 2021. Þetta er meðal þess sem fram kemur í ársskýrslu 2021 um framkvæmd umferðaröryggisáætlunar.
Hjólastígur formlega opnaður í Samgönguviku
Nýr hjólastígur, sem er hluti af leið sem liggur frá Höfðabakka að Breiðholtsbraut í Elliðaárdal, verður opnaður formlega í Samgönguviku 2022, laugardaginn 17. september. Þessi spölur heyrir undir Samgöngusáttmálann og er samstarfsverkefni Reykjavíkurborgar og Vegagerðarinnar. Reykjavíkurborg hefur séð um framkvæmdir.
Stígurinn hefur verið opinn fyrir umferð frá því í sumar en framkvæmdin er liður í því að aðskilja gangandi og hjólandi umferð í dalnum.
760 milljónum króna varið til sértækra umferðaröryggisaðgerða
Ársskýrsla 2021 um framkvæmd umferðaröryggisáætlunar er komin á vefinn. Þar er að finna ýmsar áhugaverðar upplýsingar um sértækar aðgerðir sem snúa meðal annars að sjálfvirku hraðaeftirliti, kynningum og fræðslu til almennings og eyðingu svartbletta, umhverfi vega og uppsetningu vegriða. Þessar aðgerðir eiga að leiða til fækkunar slysa og lækkunar kostnaðar samfélagsins af umferðarslysum.
