Vakt­stöð

Hlutverk og starfsemi vaktstöðvar Vegagerðarinnar

Hlutverk vaktstöðvar Vegagerðarinnar er að starfa sem miðlæg stjórnstöð fyrir þjónustu á vegum og í jarðgöngum um allt land. Hún er lykilþáttur í að tryggja öryggi vegfarenda og skilvirka samhæfingu verkefna sem snúa að umferð og vegakerfi. Stærstu verkefni vaktstöðvarinnar snúa að framkvæmd vetrarþjónustu og vöktun jarðganga, en hún sinnir einnig fjölbreyttum verkefnum á vegum, svo sem vöktun vegna snjóflóða, skriðufalla, eldgosa, jarðhræringa, vatnavaxta í ám og skemmda á vegum, auk ýmissa annarra verkefna sem stuðla að auknu öryggi og greiðri umferð.

Vaktstöðin samræmir vetrarþjónustu, fylgist með færð og ástandi vega, framfylgir vinnureglum vegna vetrarviðhalds og tekur ákvarðanir um lokanir vega vegna veðurs, ástands eða hamfara. Vakstjórar geta kallað út starfsmenn Vegagerðarinnar eða verktaka til að sinna vegaeftirliti, mokstri, hálkuvörnum og öðrum viðhaldsverkefnum, í nánu samstarfi við þjónustustöðvar sem starfa á 18 stöðum um landið. Þannig er tryggt að viðbragð sé hraðvirkt og öruggt hvar sem aðstæður skapast.

Í Hvalfjarðar-, Norðfjarðar- og Dýrafjarðargöngum er innleitt vaktkerfi ásamt eftirlits- og atvikamyndavélakerfi sem gerir vaktstjórum kleift að bregðast strax við ef hætta skapast fyrir vegfarendur. Kerfið nemur frávik frá eðlilegri umferð, til dæmis ef ökumenn stöðva í göngunum, eldur kviknar í bíl, hlutur fellur af ökutæki eða aftanívagni á veginn, eða ef hjólreiðamaður eða dýr kemst inn í göngin. Þetta tryggir hraðar viðbragðsáætlanir sem geta komið í veg fyrir alvarleg slys.

Vaktstöðin ber einnig ábyrgð á því að loka göngum þegar nýta þarf þau fyrir forgangsakstur sjúkrabíla eða lögreglu. Miklar kröfur eru gerðar til öryggis í jarðgöngum, og vöktun þeirra er lykilþáttur í því að tryggja að Vegagerðin geti brugðist fljótt og örugglega við óvæntum aðstæðum.

Vaktstöðvar Vegagerðarinnar eru starfræktar í Garðabæ og á Ísafirði. Á vaktstöð starfa samtals 22 vaktstjórar, sem vinna í nánu samstarfi við þjónustustöðvar, verktaka og aðra samstarfsaðila til að tryggja örugga og skilvirka umferð á vegum og í jarðgöngum um land allt. Með vaktstöðvarkerfinu er Vegagerðin betur í stakk búin til að bregðast við bæði daglegum viðhaldsverkefnum og óvæntum atvikum sem geta haft áhrif á öryggi vegfarenda.

Umferðarþjónusta Vegagerðarinnar 1777 sér um að upplýsa vegfarendur um færð, ferðaveður og þjónustu á vegakerfinu frá morgni til kvölds allt árið um kring.

Umferðarþjónustan svarar fyrirspurnum vegfarenda í gegnum síma og tölvupóst, sendir út tilkynningar á umferdin.is, í smáskilaboðum og í tölvupósti auk þess að annast símsvörun á skiptiborði Vegagerðarinnar.

Umferðarþjónusta 1777 vinnur náið með vaktstöð Vegagerðarinnar að öflun og miðlun upplýsinga til vegfarenda.

Umferðarþjónusta 1777 er opin frá kl. 06:30 til 22:00 alla daga, allt árið.
Skiptiborð Vegagerðarinnar er opið alla virka daga frá kl. 08:00-16:00.

Hlutverk

Hlutverk umferðarþjónustu 1777 er að veita vegfarendum nýjustu upplýsingar um færð og veður, veita leiðsögn og stuðning í síma og í tölvupóstsamskiptum, veita umsagnir vegna undanþága um þungatakmarkanir á vegum og svara fyrirspurnum um Loftbrú.

Þjónustufulltrúar fylgjast vel með veðurspám og aðstæðum á vegum, taka við ábendingum vegfarenda og miðla þeim áfram til vakstöðvar og þjónustustöðva Vegagerðarinnar.

Veturnir eru annasamasti tíminn hjá umferðarþjónustunni. Á erilsömum vetrardegi svarar umferðarþjónustan hátt í 3.000 símtölum og sendir út í kringum 150 tilkynningar, sem birtast á umferdin.is og trafficinfo.is.

Á sumrin hringja vegfarendur til að fá aðstoð við að skipuleggja ferðalög milli staða, afla upplýsinga um vegalengdir og ástand vega á hálendinu. Einnig er hringt inn með ábendingar og hvatningu um að sinna ýmsum verkum á borð við rykbindingu og heflun vega, láta vita af holum og skemmdum í vegum, fá aðstoð við Loftbrú, auk þess sem vegfarendur spyrjast gjarnan fyrir um framkvæmdir sem eru í gangi.

Umferðarþjónustan er starfrækt á Ísafirði og þar starfa átta manns sem hafa góða reynslu í upplýsingagjöf til vegfarenda.

Umferðarþjónustan sendir daglega út tilkynningar um færð og veður, framkvæmdir, lokanir og þungatakmarkanir sem geta haft áhrif á akstur um vegakerfið. Nýjustu tilkynningar má sjá á umferdin.is.