Umferðarþjónusta - Tilkynning - 20.6.2017
Frá veðurfræðingi
Það hvessir smám saman með S- og SA-átt um landið vestanvert. Á norðanverðu Snæfellsnesi má staðbundið reikna með vindhviðum allt að 30-35 m/s frá því um kl. 15 og fram á kvöldið.
Sprengisandur opnast
Mikið hefur þornað á Sprengisandi í góðviðrinu þar síðustu daga og hefur aðalleiðin, vegur F26, verið opnuð. Sprengisandsleiðirnar
niður í Skagafjörð og Eyjafjörð verða þó lokaðar enn um sinn - en akstursbann er enn allvíða á hálendinu eins og sjá má á færðarkortinu.
Framkvæmdir á Reykjanesbraut og Krýsuvíkurvegi
Unnið er við mislæg
vegamót Reykjanesbrautar og Krýsuvíkurvegar í Hafnarfirði. Umferð fer á kafla um hjáleið á
Reykjanesbraut sunnan Hafnarfjarðar. Leyfður umferðarhraði þar er 50 km/klst. Vegna vinnu við
sprengingar á framkvæmdasvæðinu þarf að stöðva umferð á Reykjanesbraut í skamman
tíma, allt að þrisvar sinnum á dag.
Krýsuvíkurvegi hefur verið lokað tímabundið, milli Rauðhellu og hringtorgs við Hraunhellu / Hringhellu. Merkt hjáleið er um Rauðhellu og Hringhellu á meðan lokun Krýsuvíkurvegar varir (u.þ.b. til 24 júní).
Einnig er verið að byggja nýtt hringtorg á Krýsuvíkurvegi (42), en um er að ræða gatnatengingar að Dofrahellu og Ásvallabraut (Klukkutorg). Í upphafi verður unnið meðfram Krýsuvíkurvegi (42) og síðar í sumar verður umferð færð yfir á hjáleið við hlið framkvæmdasvæðis. Gert er ráð fyrir að hringtorgið verði tekið í notkun 1. september 2017. - Vegfarendur eru beðnir að sýna aðgát og virða umferðarmerkingar við vinnusvæðin.
Umferðartafir á Hringvegi
Vegna endurbóta á Hringvegi í Reykjadal í Suður-Þingeyjarsýslu er umferðarhraði takmarkaður við 50 km/klst á framkvæmdasvæðinu fram í miðjan júlí. Þrengt er að umferð og má búast við lítilsháttar umferðartöfum á meðan framkvæmdir standa yfir. - Vegfarendur eru beðnir um að virða hraðatakmarkanir og sýna aðgát við vinnusvæðið þar sem menn og tæki eru við vinnu á og við akbrautina.
Búast má við umtalsverðum umferðartöfum á brúnni á Jökulsá í Lóni, um 20-30 mín í senn, milli kl 07.00 – 19.00 fram til 15. júlí vegna framkvæmda.