Umsóknarfrestur í rannsóknarsjóð Vegagerðarinnar fyrir árið 2010 er runninn út

Aðilar innan og utan Vegagerðarinnar geta sótt um fjárframlög til rannsóknaverkefna. Rannsóknarráð stofnunarinnar sér um úthlutun. Gert er ráð fyrir að hluta fjármagns sem til ráðstöfunar er, verði varið til verkefna sem stofnunin lætur vinna að eigin frumkvæði, eins og fram kemur í áherslusviðum vegna rannsókna 2010 hér á eftir.

Áherslusvið vegna rannsókna Vegagerðarinnar 2010.

Rannsóknum Vegagerðarinnar er skipt í fjóra megin flokka: Mannvirki; Umferð; Umhverfi; Samfélag. Innan Vegagerðarinnar starfa þrjár fagnefndir sem eru til ráðgjafar um rannsóknir innan þessara flokka. Ein um mannvirki, önnur um umferð og sú þriðja um umhverfi og samfélag. Í rannsóknastefnu Vegagerðarinnar, kemur fram að fyrir úthlutun rannsóknafjár, sem fram fer á fyrstu mánuðum hvers árs, kynna fagnefndirnar áherslusvið innan síns flokks fyrir umsjónarmönnum rannsóknastarfsins og kallað verði eftir verkefnahugmyndum í samræmi við það.

Rétt er að taka fram að einnig er áfram veitt fé til annarra verkefna sem ekki eru innan áherslusviðanna.

Fagnefndirnar hafa gefið út eftirfarandi áherslusvið vegna rannsókna árið 2010:

Mannvirki:

Áfram verður lögð áhersla á rannsóknir á slitlögum vega, þ.e.a.s. hönnun þeirra, framleiðslu, lögn og viðhald. Með tilkomu nýrra Evrópustaðla fyrir malbik er mikilvægt að auka rannsóknir á malbiksslitlögum, m.a. með nýjum rannsóknaaðferðum sem staðlarnir mæla fyrir um að skuli taka við af eldri aðferðum. Evrópustaðlar fyrir klæðingu eru nú á lokastigi auk þess sem ýmsar nýjungar eru að ryðja sér til rúms við hönnun og lögn klæðinga sem nauðsynlegt er fylgjast með og rannsaka. Mikilvægt er að þróa aðferðir við framleiðslu, útlögn og viðhald malarslitlags sem auka gæði þess.

Auk ofangreindra áhersluatriða ætti Vegagerðin að láta rita leiðbeiningar um tiltekna verkþætti sem unnið er að í vegagerð, til dæmisum framkvæmdaeftirlit og hönnun mannvirkja. Fagnefnd um mannvirki bendir jafnframt á að mikilvægt er að koma niðurstöðum rannsóknastarfsins á framfæri með leiðbeiningaskrifum og með námskeiðahaldi, til að stuðla að aukinni faglegri og verklegri þekkingu þeirra sem vinna að vegagerð.

Umferð:

Lögð verður áhersla á verkefni er byggjast á upplýsingaöflun og gagnavinnslu, eða úrvinnslu fyrirliggjandi upplýsinga, á sviði umferðar og umferðaröryggis, í þeim tilgangi að auðvelda áætlanagerð og þjónustu á ýmsum sviðum Vegagerðarinnar.

Lögð verður sérstök áhersla á verkefni um bætta upplýsingagjöf, nánar til tekið verkefni sem bæta framsetningu á ,og aðgengi að, gögnum sem nýtast vegfarendum. Með þessu er m.a. átt við ýmsa vefþjónustumöguleika þar sem tiltæk gögn eru gerð aðgengileg fyrir þriðja aðila með endurnot upplýsinga í huga. Dæmi um slíka vefþjónustu er aðgengi þriðja aðila að þungatakmörkunum, veður-, færðar- og myndaupplýsingum Vegagerðarinnar. Sá aðili getur þá boðið upp á SMS þjónustu, myndskilaboð o.s.frv. ef sérstakar aðstæður skapast eða sett þessar upplýsingar fram á sínum vef með öðru efni.

Áfram verður lögð áhersla á skrif leiðbeininga varðandi tiltekna þætti á sviði umferðar og umferðaröryggis. Margt hefur áunnist á þessu sviði árið 2009 en þó er ýmislegt eftir. Vegagerðin mun sjálf hafa forgöngu um leiðbeiningaskrif.

Umhverfi og samfélag:

Lögð er áhersla á verkefni sem tengjast náttúru- og menningarumhverfi samgöngumannvirkja, til dæmis með eftirfarandi stikkorðum: skipulagsáætlanir – uppgræðsla – endurheimt – fagurfræði.

Lögð er áhersla á verkefni sem tengjast gróðurhúsaáhrifum og mengun af völdum samgangna og einnig framkvæmda og þjónustu Vegagerðarinnar. Í því sambandi má nefna áhrif veðurfarsbreytinga á vegagerð, verkefni tengd orku- og eldsneytissparnaði, athugun á staðbundinni hljóð-, loft- og efnamengun og verkefni tengd umhverfiskerfi Vegagerðarinnar.

Þá er lögð áhersla á verkefni sem tengjast vistvænum samgöngum í þéttbýli og dreifbýli, s.s. almenningssamgöngum, hjólreiðum, bættu aksturslagi og vistvænni farartækjum. Til dæmis: hvernig er tekið tillit til þeirra við stefnumörkun og á áætlanastigi, umhverfismat „grænnar“ samgöngustefnu á móti 0-kosti, hvernig má hafa áhrif á ferðavenjur og notkun upplýsingakerfa sem styðja vistvænar samgöngur.

Minnt er á að við skilgreiningar rannsóknaverkefna skal í upphafi áætla hverjir koma til með að nota niðurstöður úr verkefnunum og gefa þeim tækifæri á að koma að mótun verkefnisins og innleiðingu niðurstaðna ef þurfa þykir.

Upplýsingar um verkefni sem fá fjárveitingu verða birtar á vef Vegagerðarinnar.