Þrengslin eru opin en Hellisheiðin er enn lokuð

Ábendingar frá veðurfræðingi

Almennt fer hlýnandi og hlánar á láglendi um suðvestan- og vestanvert landið, og í kvöld og nótt einnig norðan og norðaustantil. Um leið og blotnar verða vegir víða flughálir.

Færð og aðstæður

Hellisheiði er enn lokuð en flestar aðrar aðalleiðir á Suðurlandi eru færar. Þó er flughált á Mosfellsheiði en víða er nokkur hálka og þungfært á örfáum sveitavegum.

Greiðfært er á Reykjanesbraut en ófært á Suðurstrandavegi og Krýsuvíkurvegi.

Hringvegurinn er auður frá Reykjavík upp Borgarfjörð en annars er víðast hvar hálka á Vesturlandi. Fróðárheiði er ófær.

Á Vestfjörðum er ófært milli Patreksfjarðar og Bíldudals, vegur er lokaður innan við Patreksfjörð vegna snjóflóðahættu og Kleifaheiði er ófær. Eins er ófært frá Vatnsfirði og austur yfir Klettsháls. Það er flughált frá Ísafirði til Súðavíkur og inn allt Djúp. Flughált er einnig í Gufudalssveit og á Innstrandavegi.

Á Norðurlandi er víðast hvar hált. Búast má við snjóflóðahættu á Siglufjarðarvegi utan Fljóta með hlýnandi veðri. Flughált er á Þverárfjalli og nokkuð víða í Skagafirði. Flughált er einnig á Öxnadalsheiði. Þæfingsfærð er á Hálsum.

Hálka eða snjóþekja er á flestum vegum á Austurlandi en flughált er að heita má á öllu Suðausturlandi.

Misjafnir þjónustutímar

Vegfarendur eru beðnir að hafa í huga að víða er ekki mokstur eða önnur þjónusta á vegum, á kvöldin og yfir nóttina. Þá eru sumir vegir ekki í þjónustu nema fáa daga í viku. Upplýsingar um þjónustutíma eru á vef Vegagerðarinnar og í síma 1777.

Hreindýr á Austur- og Suðausturlandi

Vegagerðin og Náttúrustofa Austurlands vara vegfarendur við umferð hreindýra á Austur- og Suðausturlandi.

Sjá má staðsetningu hreindýrasvæða hér.