Rafræn ráðstefna gekk framar vonum
Nítjánda ráðstefnan er sú fyrsta rafræna
Nítjánda Rannsóknaráðstefna Vegagerðarinnar fór fram 30. október síðastliðinn. Ráðstefnan var rafræn í ár í ljósi aðstæðna í þjóðfélaginu en öll framkvæmd gekk framar vonum. 290 voru skráðir og fylgdust hátt í 200 með á hverjum tíma.
Allir fyrirlesarar fluttu erindi sín í salnum Norðurljósum í Hörpu. Alls voru fyrirlestrar 16 talsins og fyrirspurnartímar fimm. Þátttakendur gátu spurt spurninga á gegnum forritið sli.do sem tengt var ráðstefnustreyminu. Fjölmargar spurningar bárust og greinilegt að mikill áhugi var á viðfangsefnum ráðstefnunnar.
Bergþóra Þorkelsdóttir forstjóri Vegagerðarinnar setti ráðstefnuna. Aðalfyrirlesari á ráðstefnunni var Anna Steinsen sem ræddi við áhorfendur um gleði og þrautseigju á krefjandi tímum. Þar nefndi hún meðal annars mikilvægi þess að vera ekki leiðinlegur.
Sett hefur verið upp ráðstefnusíða á vef Vegagerðarinnar þar sem hægt er að nálgast ágrip og allar glærur sem birtust á ráðstefnunni.