Fréttir
Hætta af yfirgefnum bílum
eigendur beðnir um að fjarlægja fljótt og örugglega
Stórhætta getur skapast af yfirgefnum bílum þegar skyggni á vegum verður slæmt. Eigendur slíkra bifreiða eru beðnir um að fjarlægja þá strax og hægt er. Dæmi eru um að eftir veðurskot síðustu daga hafi bílar staðið yfirgefnir í allt að tvo sólarhringa.
Þess eru dæmi að ökutæki eru skilin eftir á akreinum jafnvel ljóslaus í langan tíma. Þetta skapar eðlilega stórhættu þegar skyggni er slæmt. Einnig eru mörg dæmi frá nýliðnum dögum að ökutæki eru skilin eftir í vegkanti eftir útafakstur. Þá getur skapast sú hætta að viðkomandi ökutæki verði fyrir skemmdum við snjóruðning og það skapar hættu fyrir þá sem vinna á snjómokstursbílum og fyrir aðra vegfarendur.
Þess vegna er mikilvægt að yfirgefnir bílar séu fjarlægðir um leið og veður gengur niður og fært er orðið.