Breyting á ljósaskiltum er til bráðabirgða
unnið að varanlegri lausnum - skemmdir urðu á vegakerfinu
Tilvik þar sem „CLOSED“ birtist á ljósaskilti í stað „ÓFÆRT“ verða fá á fáum stöðum og til bráðbrigða meðan unnið er að annarri og varanlegri lausn. Í vondum veðrum næst auðveldlega til þeirra sem íslensku skilja en vandamálið snýr að því að ná til ferðamanna á vegum úti.
Þótt ljósaskilti séu víða þá eru þau ekki mörg sé tekið mið af skiltaflórunni allri hjá Vegagerðinni. Tilvikin þar sem reynir á að ná til erlendra ökumanna eru enn færri þannig að þessi breyting er ekki mikil. Hún er þar að auki tilkomin vegna tæknilegra örðugleika við aðra möguleika á ljósaskiltum Vegagerðarinnar. Að öllu jöfnu hefur Vegagerðin verið afskaplega varkár í því að nota ensku á skiltum sínum.
Unnið er að lausnum á vandamálum með ljósaskiltin með framleiðanda þeirra erlendis þannig að hægt verði að nota bæði íslensku og ensku til að koma boðum til vegfarenda um lokaða eða ófæra vegi.
Reynslan síðustu daga sýnir að það er auðvelt að ná til Íslendinga eftir hefðbundnum leiðum og þá fyrst og fremst fjölmiðla. Öðru máli gegnir með útlendinga og því er farið í þessa bráðabrigðalausn til að freista þess að ná til sem flestra erlendra ökumanna með þessum hætti, komi þessi staða aftur upp.
Vegagerðin hefur einnig átt fundi með Samtökum ferðaþjónustunnar en félagsmenn þeirra, bílaleigurnar, eiga auðveldast með að ná til ferðamanna á vegum úti sem leigt hafa af þeim bíl en Vegagerðin. Vegagerðin mun aðstoða bílaleigurnar með upplýsingar um hættu af veðri á ensku.
Vegagerðin mun byrja á því að setja upp lokunarslá við Dettifossveg og skoða reynsluna af því í framhaldinu. Sláin verður þá notuð þegar Degttifossvegurinn verður ófær en síðasta vetur var nokkuð um að ferðamenn færu inn á veginn og lentu síðan í ógöngum vegna ófærðar eða slæmrar færðar. Sjá eldri frétt um lokunarslárnar.
Töluverðar skemmdir urðu á vegakerfinu þessa síðustu óveðursdaga, klæðing flettist af vegum á köflum, glit á stikum máðist auk skemmda á vegriðum. Myndirnar sýna skemmdir vestan Núpahótels á Hringveginum sunnan Vatnajökuls.
