Umferðin eykst töluvert í júní

Umferðin á Hringveginum í júní jókst um 2,6 prósent frá sama mánuði í fyrra og er þetta töluvert mikil aukning á milli mánaða. Umferðin hefur þá aukist í öllum mánuðum á þessu ári utan apríl mánaðar á 16 völdum talningarstöðum Vegagerðarinnar. Nú má reikna með því að umferðin í ár aukist um 3,5 prósent sé tekið mið af spálíkani Vegagerðarinnar.

Milli mánaða 2012 og 2013

Umferð eykst á öllum landssvæðum nema í grennd við höfuðborgarsvæðið, en þar dregst umferð lítið eitt saman eða um 0,1%. Samtals eykst umferðin um 2,6% milli júnímánaða. Fram til þessa hefur umferð því einungis dregist saman í einum mánuði, það sem af er ári, eða í apríl. Leita þarf aftur til ársins 2009 til að finna meiri heildarumferð í þessum mælipunktum í júní. 

Líklegt verður að telja að léleg tíð í júní á höfuðborgarsvæðinu hafi valdið samdrætti þar og á móti góð tíð á Norður- og Austurlandi hafi orðið til þess að umferð eykst mest á þessum svæðum. Umferðin eykst um rúmlega 18% á Austurlandi (ath. taka þarf tillit til þess að lítið umferðarmagn er í mælipunktum um austurland því verða oft hlutfallslega miklar sveiflur á því svæði) og um 8% á Norðurlandi.