Reynslusigling gekk vel
Hinni nýju Grímseyjarferju, Sæfara, var siglt til reynslu á fimmtudag
Nú er að ljúka þeim endurbótum sem Vélsmiðja Orms og Víglundar hefur unnið að á Grímseyjarferjunni Sæfara. Einn lokahnykkurinn í því ferli er reynslusigling sem farin var í gær 13. desember.
Tilgangurinn með reynslusiglingunni er að prufukeyra vélar skipsins. Siglingin tókst vel í gær og ekkert óvænt kom uppá.
Skipið lætur vel að stjórn og er lipurt að mati Jóns B. Björgvinssonar skipstjóra í ferðinni, en hann er hafnarvörður við Hafnarfjarðarhöfn.
Að loknum þessum hluta verksins verður farið í lokað útboð með það sem eftir er. En setja þarf nýja innganga á skipið, stjórnborðsmegin verður aðalinngangurinn í skipið en bakborðsmegin verður neyðarútgangur. Þetta er gert til að auka öryggi og bæta enn frekar aðgengi hreyfihamlaðra. Þá verður sett kæling í efri lest skipsins., komið fyrir gámafestingum á dekki og skipt um stál í byrðingi auk nokkurra fleiri smærri verka.
