Enn eykst umferðin á höfuðborgarsvæðinu
Aukningin í ár 6,2 prósent og hefur ekki aukist meira síðan árið 2007
Umferðin á höfuðborgarsvæðinu í júlí sl. jókst um 3,5 prósent um þrjú mælisnið Vegagerðarinnar. Þetta er mun minni aukning en sú sem á sér stað á Hringveginum. Frá áramótum nemur aukningin 6,2 prósentum og þótt það sé minni aukning en á Hringveginum þarf eigi að síður að fara allt aftur til ársins 2007 til að finna meiri aukningu.Milli mánaða 2015 og 2016
Áætlað er að umferðin á höfuðborgarsvæðinu hafi aukist mun
minna en á Hringveginum eða um 3,5% sé tekið mið af þremur mælisniðum
Vegagerðarinnar á höfuðborgarsvæðinu og 16 lykilteljurum á Hringvegi.
Umferðin jókst í öllum mælisniðum en mest um mælisnið ofan Ártúnsbrekku eða um 4,8%. Þetta er mun hóflegri aukning en á Hringveginum, sbr. fréttir þar um, og rúmlega tvöfalt minni aukning en varð á sama tíma á síðasta ári.
Frá áramótum milli áranna 2015 og 2016
Umferðin hefur nú aukist um 6,2% það sem af er ári miðað við sama
tímabil á síðasta ári. Þó þessi aukning sé mun hóflegri en á Hringveginum þarf að
fara allt aftur til ársins 2007 til að finna meiri aukningu miðað við árstíma fyrir
mælisniðin þrjú.
Umferð eftir vikudögum
Umferðin á miðvikudögum hefur aukist hlutfallslega mest og
það sem vekur athygli er að sá vikudagur er orðinn stærstur í umferðinni innan
höfuðborgarsvæðisins. Áður voru föstudagar stærstir líkt og á Hringveginum.
Þetta kann að gefa vísbendingu um breytta aksturshegðun og að hún sé borin uppi
af auknum umsvifum í atvinnulífi.
Horfur út árið 2016
Nú er útlit fyrir að umferðin á höfuðborgarsvæðinu geti
aukist um 5 - 6%, miðað við síðasta ár. Eins og áður hefur komið fram eru það mun
hóflegri horfur en á Hringvegi en engu að síður mjög mikil aukning, á þessu
svæði.
