Horf­um fram á veginn

Í erindum dagsins var meðal annars fjallað um hvernig bæta megi verkefnastýringu, efla gagnadrifna ákvarðanatöku og nýta innviðafjárfestingar sem best. Einnig var rætt um mikilvægi markvissrar áætlanagerðar, viðhalds innviða og þeirra áskorana sem fylgja framkvæmd stórra verkefna í síbreytilegu umhverfi.

Aðalfyrirlesari ráðstefnunnar var Dan Gardner, kanadískur rithöfundur og verðlaunablaðamaður, sem flutti erindið Getting Big Things Done on Budget and on Time. Hann fjallaði um lærdóm af stórum innviðaverkefnum víðs vegar um heim og hvaða þættir skipta mestu máli til að verkefni standist tíma- og kostnaðaráætlanir.

Meðal annarra fyrirlesara var Michael Ebbesen, framkvæmdastjóri reksturs og viðhalds hjá dönsku Vegagerðinni (Vejdirektoratet), sem fjallaði um eignastýringu og viðhald ríkisvega í Danmörku. Þá fluttu sérfræðingar Vegagerðarinnar erindi um meðal annars slitlög vega, gagnadrifna ákvarðanatöku í viðhaldi, verkefnastjórnsýslu, samgönguáætlun í framkvæmd og þróun verkefnastjórnunarkerfisins Varðar. Ráðstefnunni lauk með erindi um þær áskoranir sem geta haft áhrif á framgang stórra framkvæmda.