Reykja­nesbraut Bústaða­vegur

Í stað núverandi ljósagatnamóta verður hönnuð brú fyrir akandi sem aka norður Reykjanesbraut á leið inn á Bústaðaveg. Brúin kemur í stað núverandi ljósagatnamóta en miðeyju Reykjanesbrautar verður lokað og vinstri beygja frá Bústaðavegi inn á Reykjanesbraut aflögð. Við vestari akbraut Reykjanesbrautar verða að- og fráreinar þar sem einungis verða mögulegar hægribeygjur inn og út af Bústaðavegi. 

Í austurkanti samsíða Reykjanesbraut er gert ráð fyrir sérakreinum fyrir Borgarlínu. Til að skapa rými fyrir Borgarlínu og forðast inngrip á verndarsvæði Elliðaárdals er gert ráð fyrir að Reykjanesbraut verði hliðrað til vesturs á kafla við gatnamótin.

Auk hönnunar við færslu Reykjanesbrautar og nýrrar brúar fyrir umferð inn á Bústaðaveg innifelur verkið hönnun sérakreina Borgarlínu, fyrir hvora akstursstefnu meðfram austurkanti Reykjanesbrautar frá Stekkjarbakka A-V að Vogabyggð ásamt framlengingu tveggja undirganga undir Reykjanesbraut. Lega Borgarlínu frá Stekkjarbakka að Vogabyggð verður í samræmi við niðurstöður frumdraga, þar með talin hæðarlega.

Borgarlína mun þvera Vesturlandsveg undir tveimur nýjum brúm sem munu auk sérrýmis Borgarlínu rúma nýja hjóla- og göngustíga ásamt breikkun á vestari kvísl Elliðaáa, sem í dag rennur í mjóum steyptum stokk undir Vesturlandsveg, og verður hönnun þessara nýju brúa hluti þessa verkefnis.

Aðlaga þarf suðausturrampa að Vesturlandsvegi í tengslum við þverunina og gert er ráð fyrir að rampinn fái pláss á nýrri brú á Vesturlandsvegi.

Sérakreinar Borgarlínu munu þaðan liggja austan megin við norðausturrampa gatnamóta við Vesturlandsveg að Súðarvogi þar sem áætlað er að skiptistöð Borgarlínu rísi, Vogastöð.

Verkefnið er hluti Samgöngusáttmálanum sem ríkið og sex sveitarfélög á höfuðborgarsvæðinu (Garðabær, Hafnarfjörður, Kópavogur, Mosfellsbær, Reykjavík og Seltjarnarnes) hafa undirritað. Samgöngusáttmálinn felur í sér sameiginlega framtíðarsýn og heildarhugsun fyrir skipulagssvæðið. Markmiðið er að auka öryggi, bæta samgöngur fyrir alla ferðamáta og minnka tafir, stórefla almenningssamgöngur og draga úr mengun af völdum svifryks og losun gróðurhúsalofttegunda til að standa við loftslagsmarkmið stjórnvalda.