15. desember 2023

Vel heppn­uð æfing með óvænt­um endi

Fimmtudaginn 14. desember fór fram björgunaræfing á Baldri í Stykkishólmi. Nemendur á efsta stigi grunnskólans í Stykkishólmi og kennarar þeirra voru farþegar í æfingunni ásamt nokkrum úr starfshópi Sæferða. Viðstaddir voru einnig fulltrúar frá öryggisdeild Eimskips, Samgöngustofu, Landsbjörgu og Survitec, fyrirtækinu sem þjónustar björgunarbúnaðinn. Alls komu 78 aðilar að æfingunni, ýmist sem þátttakendur eða eftirlitsaðilar.

Æfingin gekk vel þó veðrið væri ekki gott. Það var vindasamt og snjókoma á köflum, en í raun góðar aðstæður fyrir æfingu sem þessa. Farþegar, þá sérstaklega nemendur grunnskólans, stóðu sig einstaklega vel í erfiðum aðstæðum og virtust ekki láta kuldann á sig fá.

Að æfingu lokinni reyndi á ný á viðbragðsgetu áhafnar Sæferða þegar eldur kom upp í bíl um borð í ferjunni Baldri. Baldur var þá bundinn við bryggju í Stykkishólmi og bíllinn kyrrstæður á bílaþilfarinu þar sem eldurinn kviknaði.

Áhöfnin brást skjótt og faglega við aðstæðum, og tókst að ráða niðurlögum eldsins án þess að slys yrðu á fólki eða tjón hlytist af á ferjunni sjálfri. Bíllinn, sem er í eigu starfsmanns Sæferða, varð hins vegar fyrir miklu tjóni og er ónýtur.

Slökkvilið Stykkishólmsbæjar og lögregla komu á vettvang skömmu síðar. Þá hafði áhöfnin þegar slökkt eldinn og komið bílnum frá borði, sem dró úr frekari hættu. Atvikið verður rannsakað og unnin skýrsla sem verður send til Samgöngustofu og rannsóknarnefndar sjóslysa. Vegagerðin og Sæferðir munu í samstarfi við viðeigandi yfirvöld fara yfir atburðarásina og meta hvort tilefni sé til frekari úrbóta.

Þrátt fyrir að um óvænt og alvarlegt atvik hafi verið að ræða má líta á það sem jákvætt að allar viðbragðsáætlanir og brunavarnir virkuðu sem skyldi. Atvikið sýnir mikilvægi reglulegra æfinga og viðbúnaðar, sem geta skipt sköpum þegar raunveruleg neyðarástand skapast.