29. janúar 2024Færð á leiðum til Grindavíkur
Færð á leiðum til Grindavíkur
Unnið er að mokstri og hálkuvörnum á leiðum til Grindavíkur. Á Krýsuvíkurvegi er hálka. Á Suðurstrandavegi fer hlýnandi og krap hefur myndast á veginum. Á Grindavíkurvegi er krapi og skafrenningur. Þar er blásari með plóg að störfum og von á bíl að salta veginn. Samkvæmt upplýsingum frá lögreglunni er búið að losa bíla sem sátu fastir í snjó.
Frá Grindavíkurvegi rétt fyrir hádegi í dag.
Vegagerðin hefur unnið af fullum krafti við snjómokstur á Krýsuvíkurvegi frá því um klukkan fjögur í nótt til að tryggja færð fyrir vegfarendur. Vegurinn var ruddur tvisvar fram og til baka, þar sem snjó var rutt í burtu og yfirborð vegarins gert greiðfært. Seinni ferðin var farin rétt fyrir klukkan sjö og þá var Krýsuvíkurvegur í góðu ástandi og vel fær.
Samhliða var Grindavíkurvegur hálkuvarinn, en á þeim tíma var ekki snjór á veginum. Með morgninum versnaði veðrið hins vegar mjög hratt, með snjókomu og skafrenningi sem hafði áhrif á færðina og gerði akstur erfiðan á nokkrum köflum. Til að bregðast við þessum aðstæðum voru kölluð út fleiri snjómoksturstæki og starfsfólk Vegagerðarinnar unnið hratt við að halda vegunum færum.
Vegagerðin hefur aukið viðbúnaðinn þessa viku til að mæta breyttum veðurskilyrðum. Fleiri tæki hafa verið sett á bakvakt og eru til taks ef veður versnar, þannig að hægt sé að sinna snjómokstri og hálkuvörnum á sem skilvirkastan hátt. Markmið Vegagerðarinnar er að tryggja öryggi vegfarenda, draga úr tafartímum og viðhalda greiðfærum vegum í öllum aðstæðum.
Þar sem nú er hávetur og allra veðra von eru vegfarendur beðnir um huga vel að aðstæðum til aksturs. Hægt er að fylgjast með færð og veðri á www.umferdin.is en þar eru nýjustu upplýsingar birtar. Einnig er hægt að fá upplýsingar í þjónustusímanum 1777.
Grindavíkurvegur um kl. 13.30.