19. júní 2023Samkomulag milli Vegagerðarinnar og Hafnarfjarðarbæjar
Samkomulag milli Vegagerðarinnar og Hafnarfjarðarbæjar
Vegagerðin og Hafnarfjarðarbær undirrituðu á dögunum samning um kostnaðarskiptingu vegna umfangsmikilla framkvæmda við tvöföldun Reykjanesbrautar á milli Krýsuvíkurvegar og Hvassahrauns. Um er að ræða einn af stærri samgöngubótaverkefnum á höfuðborgarsvæðinu, sem mun hafa veruleg áhrif á umferðarflæði, öryggi og tengingar á milli sveitarfélaga.
Fremri röð frá vinstri. Valdimar Víðisson, Rósa Guðbjartsdóttir, Óskar Örn Jónsson og Jón Heiðar Gestsson. Aftari röð frá vinstri: Sigurður Haraldsson, Helga Stefánsdóttir og Sigurður Nordal.
Með tvöföldun vegarins verður tryggt að umferð geti runnið greiðar á þessum mikilvæga samgönguási sem þjónar bæði íbúum svæðisins, atvinnulífi og ferðamönnum sem sækja Reykjanesið heim eða fara til og frá Keflavíkurflugvelli.
Framkvæmdin er samstarfsverkefni fjölmargra aðila og er gott dæmi um hvernig opinberir aðilar, sveitarfélög og fyrirtæki geta sameinað krafta sína til að ná fram markmiðum sem gagnast samfélaginu í heild. Að verkefninu koma, auk Vegagerðarinnar og Hafnarfjarðarbæjar, HS Veitur, Míla, Orkufjarskipti, Ljósleiðarinn, Carbfix og Veitur. Þátttaka þessara fyrirtækja er mikilvæg, þar sem framkvæmdin felur ekki aðeins í sér vegagerð heldur einnig tilfærslu og lagningu innviða sem snúa að orku-, vatns- og fjarskiptakerfum.
Markmiðið með tvöföldun Reykjanesbrautar á þessum kafla er að mæta auknum umferðarþunga á svæðinu og bæta öryggi allra vegfarenda. Verkefnið er jafnframt liður í því að undirbúa fyrirhugaða uppbyggingu í Hvassahrauni og tengingar við ný íbúðarsvæði og atvinnusvæði. Með þessu verður stigið stórt skref í átt að nútímalegri, öruggari og skilvirkari samgöngum á einni af helstu samgönguæðum landsins.
Bæjarráð Hafnarfjarðar samþykkti á fundi sínum þann 1. júní síðastliðinn fyrirliggjandi samning þar sem kostnaðarhlutdeild Hafnarfjarðarbæjar í öllum kostnaði verksins er um 10,3%. „Síðasti áfangi tvöföldunar Reykjanesbrautar í Hafnarfirði er í sjónmáli og er það mikið fagnaðarefni. Við höfum lengi beðið eftir þessari stund enda Reykjanesbrautin ein fjölfarnasta braut landsins og framkvæmdin mikilvægur innviður í uppbyggingu samgöngumannvirkja og eflingu samgangna í Hafnarfirði og á höfuðborgarsvæðinu öllu,“ sagði Rósa Guðbjartsdóttir bæjarstjóri Hafnarfjarðar.
Vegagerðin og ÍAV undirrituðu verksamning um tvöföldun Reykjanesbrautar milli Krýsuvíkurvegar og Hvassahrauns ásamt aðliggjandi hliðarvegum þann 17. maí síðastliðinn. Undirbúningur er hafinn og framkvæmdir hefjast síðsumars.
Framkvæmdin felur í sér lagningu Reykjanesbrautar á um 5,6 km kafla og inni í verkinu er einnig bygging brúarmannvirkja og undirganga fyrir akandi, gangandi og hjólandi. Á Reykjanesbraut verða gerð mislæg gatnamót við Rauðamel en þar er að finna nýtt framtíðar byggingarsvæði Hafnarfjarðarbæjar. Mislæg gatnamót við Straumsvík verða stækkuð og bætt við tengingu að iðnaðarsvæði Hafnarfjarðar við Álhellu. Einnig verða gerðir eftirlitsstaðir við Reykjanesbraut og stofnstígur fyrir gangandi og hjólandi milli Hraunavíkur og Straums ásamt tengingu við Straumsvík.
Stefnt er að því að verkinu verði að fullu lokið í lok júní 2026.
Myndin er frá undirritun samkomulagsins. Fremri röð frá vinstri. Valdimar Víðisson formaður bæjarráðs, Rósa Guðbjartsdóttir bæjarstjóri Hafnarfjarðar, Óskar Örn Jónsson forstöðumaður hjá Vegagerðinni og Jón Heiðar Gestsson verkefnastjóri. Aftari röð frá vinstri: Sigurður Haraldsson sviðsstjóri umhverfis- og skipulagssviðs, Helga Stefánsdóttir forstöðumaður framkvæmda- og rekstrardeildar hjá Hafnarfjarðarbæ og Sigurður Nordal sviðsstjóri stjórnsýslusviðs Hafnarfjarðarbæjar.