15. október 2025

Nokkr­ir áfangar vegna nýs Arnar­nesvegar á loka­metr­unum

Nú er um eitt ár þar til að framkvæmdum við Arnarnesveg lýkur, en þær hófust í september 2023. Í Elliðaárdal er unnið við frágang göngu- og hjólastíga og nýrrar brúar yfir Dimmu, sem verður kærkomin samgöngubót á svæðinu. Uppsetningu brúarinnar er lokið og búið er að malbika göngu- og hjólastíga sem liggja að henni. Eftir stendur að setja upp varanlegt handrið og lýsingum meðfram stígunum. Áætlað er að þeirri vinnu ljúki fyrir lok október og þá verður opnað fyrir umferð gangandi og hjólandi vegfarenda yfir brúna. Stígarnir sitt hvoru megin við ána hafa þegar verið teknir í notkun.

Unnið er við frágang á dælubrunni við nýju undirgöngin undir Breiðholtsbraut á móts við Völvufell. Að þeirri vinnu lokinni verða undirgöngin opnuð fyrir gangandi og hjólandi vegfarendur.

Í vegstæði Arnarnesvegar við Rjúpnaveg, þar sem ný undirgöng verða staðsett, er nú unnið við umfangsmiklar breytingar á stofnlögnum fyrir heitt og kalt vatn, auk tenginga við frárennslislagnir á svæðinu. Þessar framkvæmdir eru nauðsynlegar til að tryggja að innviðir samræmist nýrri legu vegarins og að þjónustukerfi virki með öruggum og áreiðanlegum hætti til framtíðar. Framleiðslu á forsteyptum einingum undirganganna er lokið og styttist í að þeim verði komið fyrir á sínum stað, sem markar mikilvægan áfanga í framvindu verksins.

Vegna þessara framkvæmda þurfti að loka undirgöngunum við Rjúpnaveg tímabundið, sem hefur áhrif á umferð gangandi og hjólandi vegfarenda á svæðinu. Leitast er við að halda röskun í lágmarki og verður undirgöngunum opnað á ný þegar aðstæður leyfa og framkvæmdum á þessum hluta verksins lýkur.

Styttri hjáleið fyrir gangandi og hjólandi

Til að stytta hjáleið fyrir gangandi- og hjólandi umferð fram hjá framkvæmdasvæðinu var gerð bráðabirgða gönguþverun á Arnarnesveg á móts við Rjúpnasali og stígtengingar þaðan inn á aðalstígakerfið. Með þessum ráðstöfunum er leitast við að tryggja betra aðgengi og greiðari leiðir fyrir óvarða vegfarendur á meðan á framkvæmdum stendur. Til að auka enn frekar öryggi gönguleiðarinnar var sérstök gangbrautarlýsing sett upp við gönguþverunina á Arnarnesvegi og einnig við Baugatorg, sem bætir sýnileika og öryggi, sérstaklega í dimmri tíð.

Þá er vinna við uppsetningu undirsláttar og járnbendingu fyrir brúardekk brúar yfir Breiðholtsbraut langt komin. Verkið hefur gengið samkvæmt áætlun og er gert ráð fyrir að steypa brúna í byrjun nóvember, að því gefnu að veðuraðstæður verði hagstæðar og ekkert óvænt komi upp.

Samhliða þessum framkvæmdum er unnið við fyllingar í vegstæði Arnarnesvegar, auk þess sem unnið er að fyllingum undir stíga og landmótun á verksvæðinu í heild. Þessi vinna er mikilvægur liður í að móta endanlegt yfirbragð svæðisins og tryggja að samgöngumannvirki falli vel að umhverfinu.

Áætluð verklok Arnarnesvegar og tengdum framkvæmdum eru í nóvember 2026, að því gefnu að framkvæmdir haldi áfram samkvæmt áætlun og ytri aðstæður raski ekki framvindu verksins.