11. febrúar 2022Morgunfundur um Samgöngusáttmálann – Sagan og staðan
Morgunfundur um Samgöngusáttmálann – Sagan og staðan
Saga og staða verkefna á vegum Samgöngusáttmálans verður til umfjöllunar á morgunfundi Vegagerðarinnar, þriðjudaginn 15. febrúar kl. 9.00–10.15. Á fundinum verður farið yfir helstu framkvæmdir og áætlanir sem tengjast sáttmálanum, hvernig verkefnum hefur miðað fram á við og hvaða framtíðarsýn blasir við næstu árin. Þetta er því kjörið tækifæri fyrir alla þá sem hafa áhuga á samgöngumálum að fá innsýn í stöðu mála og beina svör við spurningum sem kunna að vakna.
Fundinum verður streymt beint á vef Vegagerðarinnar, www.vegagerdin.is, og á Facebook-síðu stofnunarinnar, þannig að allir sem vilja geta fylgst með, óháð staðsetningu. Þeir sem kjósa að mæta á staðinn eru jafnframt velkomnir á fundinn í húsnæði Vegagerðarinnar að Suðurhrauni 3 í Garðabæ. Þar verður opið meðan húsrúm leyfir og fundargestum boðið upp á kaffi og léttar veitingar til að gera morguninn notalegri.
Hægt verður að senda inn spurningar á Sli.do. Lykilorðið er „sattmali“.
Linkur á streymið:
https://livestream.com/accounts/5108236/events/10157832
Dagskrá fundarins:
Bergþóra Þorkelsdóttir, forstjóri Vegagerðarinnar, setur fundinn.
Davíð Þorláksson, framkvæmdastjóri Betri samgangna.
Samgöngusáttmálinn. Aðdragandi og þýðing hans.
Bryndís Friðriksdóttir, svæðisstjóri Höfuðborgarsvæðis Vegagerðarinnar.
Stofnvegaframkvæmdir 2022 og verkefni varðandi Borgarlínuna.
Katrín Halldórsdóttir, verkfræðingur hjá Höfuðborgarsvæði Vegagerðarinnar.
Uppbygging göngu- og hjólastíga á höfuðborgarsvæðinu. Hvar verða næstu stígar lagðir?
Bergþóra Kristinsdóttir, framkvæmdastjóri Þjónustusviðs Vegagerðarinnar.
Umferðarflæði og umferðarljósastýringar.
Um Samgöngusáttmálann:
Samgöngusáttmálinn var undirritaður haustið 2019 milli ríkisins og sex sveitarfélaga á höfuðborgarsvæðinu. Hann markar tímamót í samgöngumálum landsins þar sem áhersla er lögð á langtímasýn og samvinnu allra helstu aðila til að tryggja sjálfbærar og hagkvæmar samgöngur til framtíðar. Markmiðið með sáttmálanum er að auka umferðaröryggi, bæta samgöngur fyrir alla ferðamáta og minnka tafir í umferðinni. Með því er stefnt að því að stórefla úrval ferðamáta, draga úr mengun af völdum svifryks og lækka losun gróðurhúsalofttegunda, þannig að unnt sé að standa við loftslagsmarkmið stjórnvalda og sveitarfélaga.
Í sáttmálanum felst meðal annars að byggja upp örugga og greiðfærar stofnæðar, efla almenningssamgöngur, og koma á víðtæku neti hjóla- og göngustíga sem tengja saman hverfi og sveitarfélög. Einnig er unnið að undirbúningi og uppbyggingu Borgarlínunnar, sem á að verða burðarás almenningssamgangna á svæðinu, ásamt því að stýra flæði bílaumferðar með markvissum hætti.
Betri samgöngur ohf. hafa yfirumsjón með framkvæmd sáttmálans og sinna eigendaeftirliti með uppbyggingu samgöngumannvirkjanna, auk þess að tryggja fjármögnun verkefnanna. Vegagerðin annast á hinn bóginn undirbúning, hönnun og verklegar framkvæmdir á vegum sáttmálans í nánu og góðu samstarfi við sveitarfélögin á höfuðborgarsvæðinu. Með þessum hætti sameinast kraftar margra aðila í því að skapa öruggara, skilvirkara og umhverfisvænna samgöngukerfi sem þjónar þörfum íbúa og atvinnulífs á svæðinu til langs tíma.
Nánari upplýsingar veita
Sigríður Inga Sigurðardóttir, samskiptadeild s. 522-1012/866-1777
G. Pétur Matthíasson, upplýsingarfulltrúi s. 522-1006/865-3163