15. september 2025

Góður gangur í fram­kvæmd­um á Dynj­andis­heiði

Í vor var hafist handa við að fjarlægja steypta brú yfir ánna Svínu, auk þess að sprengja klöpp í vegstæði. Í maí og júní var unnið við Dynjandaveg, sem er 800 m langur og liggur inn að fossinum Dynjanda, og sett voru tvö stálræsi í ánna Svínu en þau eru 220 cm og 240 cm að stærð. Þá var áfram unnið við sprengingar í vegsvæði og í námu.

Í júlí var unnið að mölun á klæðingarefni og haldið áfram með fyllingar í Dynjandavegi. Í lok þess mánaðar var búið að sprengja um 30 þúsund rúmmetra, fylling komin í Dynjandaveg og auk þess var unnið við fyllingar á um 400 m kafla á Dynjandisheiði.

Verkið hélt áfram og í ágúst var búið að sprengja um 40 þúsund rúmmetra, bæði í námu og í vegsvæði. Þá var komin fylling í Dynjandaveg og byrjað að keyra út styrktarlag á hluta vegarins. Unnið var á um 1000 m kafla á Dynjandisvegi og undirbúningur hófst á efsta hluta vegkaflans.

Þegar framkvæmdir hófust voru sex starfsmenn á svæðinu og vinnutæki samanstóðu af tveimur beltavélum, tveimur búkollum, einum trukki,  borvagni og jarðýtu. Í sumar hefur bæst við mannskapinn og tækjum fjölgað. Von er á fleira starfsfólki og tækjum á næstu vikum.

Verkið fór aðeins seinna af stað en upphaflegar áætlanir gerðu ráð fyrir. Það gekk rólega fyrstu mánuðina en nú er góður gangur í verkinu.

Um framkvæmdina:

• Þriðji og síðasti áfangi nýs Vestfjarðavegar um Dynjandisheiði, samtals um 7,2 km í nýju vegstæði.
• Endurbætur á 1 km kafla Dynjandavegar (leiðin að Dynjanda).
• Hluti af verkinu er einnig nýtt keðjunarplan og áningastaður.
• Áætluð verklok: lok september 2026.

Verktaki er Borgarverk ehf. og Verkís sér um eftirlit.