1. september 2022

Fyrsti fundur verk­efnis­stjórnar Sunda­brautar

Hlutverk verkefnisstjórnar Sundabrautar er að hafa yfirumsjón með undirbúningi framkvæmdarinnar, tryggja samræmi milli allra þátttakenda og fylgja eftir öllum mikilvægustu áföngum verkefnisins. Stefnt er að því að framkvæmdir við Sundabraut geti hafist árið 2026 og að nýja stofnleiðin verði tekin í notkun árið 2031. Verkefnisstjórnin mun sjá til þess að undirbúningur sé skipulagður, skilvirkur og að öll lög og reglugerðir sem tengjast framkvæmdatillögunni séu virt.

Næstu skref undirbúningsins fela í sér ítarlega vinnu við mat á umhverfisáhrifum framkvæmdarinnar, frekari útfærslu mismunandi valkosta og samráð við hagsmunaaðila, sveitarfélög, landeigendur og aðra sem verkefnið snertir. Verkefnisstjórnin mun jafnframt tryggja að allar nauðsynlegar skipulagsbreytingar og samþykktir liggi fyrir áður en framkvæmdir hefjast.

Verkefnisstjórnina skipa:

• Guðmundur Valur Guðmundsson, framkvæmdastjóri þróunarsviðs Vegagerðarinnar – formaður

• Bryndís Friðriksdóttir, svæðisstjóri höfuðborgarsvæðis Vegagerðarinnar

• Árni Freyr Stefánsson, fulltrúi innviðaráðuneytis

• Guðbjörg Lilja Erlendsdóttir, samgöngustjóri Reykjavíkurborgar – fulltrúi Reykjavíkurborgar

• Sævar Freyr Þráinsson, bæjarstjóri á Akranesi – fulltrúi Sambands íslenskra sveitarfélaga

Vegagerðin hefur auglýst eftir verkefnastjóra Sundabrautar sem mun vinna náið með verkefnisstjórninni að öllum undirbúningi framkvæmda.

Starfslýsing verkefnastjóra felur í sér heildarstjórn á undirbúningi framkvæmdanna, þar með talið gerð tímaáætlana, kostnaðaráætlana og viðskiptaáætlana, auk undirbúnings fyrir útboð og samninga við verktaka. Verkefnastjóri starfar í nánu samstarfi við verkefnisstjórn og annast samskipti við hagsmunaaðila, tryggir að verkefnið uppfylli allar kröfur laga og reglugerða og tekur þátt í stefnumótun sem tryggir skilvirkni og öryggi framkvæmda.

Á næstu misserum verður lögð rík áhersla á umhverfismat framkvæmdarinnar, samráð við nærumhverfi og undirbúning nauðsynlegra breytinga á skipulagsáætlunum. Markmið þessarar vinnu er að tryggja að framkvæmdir við Sundabraut geti hafist eigi síðar en árið 2026 og að þær verði fullkláraðar árið 2031 með hliðsjón af bæði samgöngumálum, umhverfi og hagsmunum samfélagsins. Verkefnisstjórnin mun jafnframt leggja áherslu á að upplýsingamiðlun til almennings verði skýr og aðgengileg, svo allir geti fylgst með framgangi verksins.