Viðhorf og ferða­venjur erlendra ökumanna bíla­leigu­bíla á Íslandi sumar­ið 2017

Könnunin sem sagt er frá í þessari skýrslu, var gerð hjá erlendum ferðamönnum sem tóku bíl á leigu hjá bíleleigunni Geysi á tímabilinu júní til loka ágúst 2017. Meðal þess sem fram kemur í skýrslunni er að algengast er að leigutakar séu karlmenn og eru þeir flestir á aldrinum 30-49 ára. Lang flestir svarendur eru frá Evrópu, en afar fá svör eru frá Asíu. Spurningalistinn var á ensku og er það m.a. talið skýra þessa litlu þátttöku þaðan, en einnig kemur fram að tæpur fimmtungur gefur ekki upp þjóðerni sitt og er talið líklegt að þar séu innifaldir stór hluti frá Asíulöndunum.
Flestir ferðamenn taka á leigu minnstu gerð fólksbíla (43%), en tæplega 30% velja stærri gerðir og leigja jepplinga. Meðalleigutíminn er um 9 dagar, sem gefur til kynna að fólk sé oft lengi á ferð og hafi tök á að kanna landið í rólegheitum. Langflestir aka yfir 1.000 km á meðan á dvöl stendur og ferðast þannig um stór svæði landsins. Einnig kemur fram að 86% svarenda segjast hafa ekið á malarvegum og 31% á hálendisvegum, sem bendir til þess að stór hluti ferðamanna fari um vegi þar sem færð og aðstæður geta verið breytilegar. Athygli vekur þó að 6% viðurkenna að hafa ekið utan vega sem er óheimilt og veldur náttúruspjöllum.

Um 90% svarenda telja sig hafa fengið nægar upplýsingar um akstur á íslenskum vegum áður en lagt var af stað. Þeir sem vildu meiri upplýsingar nefndu helst þörf fyrir betri yfirsýn yfir ástand vega, leiðbeiningar um akstur á ákveðnum svæðum og fræðslu um utanvegakstur. Tæplega 30% leituðu upplýsinga hjá Vegagerðinni og Veðurstofunni, sem sýnir að opinberar upplýsingar gegna lykilhlutverki í undirbúningi og ákvarðanatöku ferðamanna. Yfir 90% svarenda töldu sig örugga eða nokkuð örugga í akstri um landið og almennt gekk þeim vel að rata á áfangastað eftir skilti og vegmerkingum. Um 77% áttu ekki í neinum eða litlum erfiðleikum með að skilja merkingar, sem bendir til að skilti séu að mestu skýr og aðgengileg. Þó nefna margir að fáir staðir séu til að stoppa og taka myndir, sem oft reynist ferðafólki áskorun og getur skapað hættur í umferð þegar stöðvað er á röngum stöðum.