Vatnsdalsvegur (722) í Húnabyggð
- TegundVegir
- StaðaKynningargögn
- Verktími2025–2026
- Markmið
- Öruggar samgöngurGreiðar samgöngurJákvæð byggðaþróun
- Heimsmarkmið
- 8. Góð atvinna og hagvöxtur9. Nýsköpun og uppbygging
- Flokkar
- Undirbúningur
- Svæði
- Norðurland
Vegagerðin kynnir hér með fyrirhugaða endurbyggingu Vatnsdalsvegar (722) á 14,9 km löngum kafla í Vatnsdal í sveitarfélaginu Húnabyggð. Vegurinn er hluti af grunnkerfi samgangna á svæðinu og gegnir mikilvægu hlutverki fyrir íbúa, atvinnulíf og umferð um dalinn. Núverandi vegur er með malaryfirborði og uppfyllir ekki öryggiskröfur Vegagerðarinnar, hvorki hvað varðar burðargetu, yfirborðsgæði né akstursöryggi.
Tilgangur framkvæmdarinnar er að bæta vegasamgöngur um Vatnsdal, auka umferðaröryggi og tryggja greiðari og öruggari ferðir um svæðið allt árið um kring. Endurbyggingin felur meðal annars í sér styrkingu vegarins og lagningu bundins slitlags, sem mun draga úr viðhaldsþörf og bæta akstursþægindi.
Framkvæmdin er í samræmi við markmið samgönguáætlunar um að auka umferðaröryggi og fjölga vegum með bundnu slitlagi, auk þess að stuðla að bættum samgöngum og aukinni þjónustu við íbúa og atvinnulíf á landsbyggðinni.
Kynning fer fram í Skipulagsgáttinni og er kynningartími frá 6. desember 2024 til 13. janúar 2025. Umsagnir munu birtast undir málinu (málsnr. 1474/2024) jafnóðum og þær berast á eftirfarandi slóð: https://skipulagsgatt.is/issues/2024/1474
Endurbygging Vatnsdalsvegar er fyrirhuguð innan byggðar í Vatnsdal á kaflanum frá Hringvegi (1) að Undirfellsrétt. Veglínan fylgir að mestu núverandi vegi, en á tveimur stöðum, við Hnjúk og Helgafell, er vikið lítillega frá núverandi legu til að bæta umferðaröryggi, auka yfirsýn og skapa betri akstursaðstæður. Með breytingunum er leitast við að draga úr hættum og bæta flæði umferðar um svæðið, einkum við krefjandi aðstæður.
Áætluð efnisþörf vegna framkvæmdarinnar er um 187 þúsund rúmmetrar. Gert er ráð fyrir að efnistaka fari að mestu fram úr skeringum meðfram veginum auk þriggja fyrirhugaðra náma á svæðinu. Með þessu er leitast við að nýta efni sem næst framkvæmdasvæðinu, draga úr flutningsþörf og lágmarka rask á umhverfi eins og kostur er.
Framkvæmdin hefur verið tilkynnt til Skipulagsstofnunar í samræmi við lög um umhverfismat framkvæmda og áætlana nr. 111/2021. Tilkynningin er lögð fram á grundvelli 19. gr. laganna og fellur undir 1. viðauka, tölulið 10.08, flokk B, þar sem framkvæmdin nær yfir meira en 5 km kafla innan verndarsvæða, sbr. formála 1. viðauka, iii. lið 2. töluliðar 2. viðauka. Markmið ferlisins er að meta áhrif framkvæmdarinnar á umhverfi og tryggja að tekið sé tillit til viðkvæmra svæða og hagsmuna.
Skipulagsstofnun hefur óskað eftir umsögnum frá fjölda hagsmunaaðila, þar á meðal Húnabyggð, Fiskistofu, Heilbrigðiseftirliti Norðurlands vestra, Landgræðslunni, Minjastofnun Íslands, Mílu, Náttúrufræðistofnun Íslands, Rarik og Umhverfisstofnun. Frestur til að skila umsögnum er til 13. janúar 2025 og er ákvörðunar Skipulagsstofnunar að vænta 27. janúar sama ár.
Almenningi gefst einnig kostur á að fylgjast með framvindu málsins á Skipulagsgáttinni, þar sem birtar eru umsagnir eftir því sem þær berast. Þar er jafnframt hægt að nálgast frekari gögn um framkvæmdina. Að loknum kynningartíma mun Skipulagsstofnun hafa samband við framkvæmdaraðila um næstu skref í ferlinu.