10. mars 2026

Tillaga starfs­hóps: Tveir megin­vegir Vest­fjarða verði skil­greind­ir sem hluti af Hring­vegin­um

Innviðaráðherra fékk minnisblað starfshópsins afhent í síðustu viku  og verður tillagan tekin til skoðunar í ráðuneytinu. Í minnisblaði starfshópsins er leitast við að greina mismundi sjónarmið og kosti þess og að breyta vegnúmerum á Vestfjörðum og voru tveir valkostir bornir saman.

• Hringvegur 1 – minni hringur (vegir nr. 60, 61)
• Hringvegur 2 – stór hringur (vegir nr. 60, 61, 62, 63, 68)

Jafnar stöðu landshlutans og styrkir byggðir

Helstu rök starfshópsins fyrir því að skilgreina tvo meginvegi um Vestfirði sem hluta af Hringvegi 1 er að það muni jafna stöðu Vestfjarða gagnvart öðrum landshlutum og styrkja byggð á svæðinu. Leiðin sem um ræðir verður öll með bundnu slitlagi árið 2027 og þeir vegir sem um ræðir svipaðir að gæðum og stærstur hluti af Hringvegi 1.

Þar sem hópnum var upphaflega falið að skoða kosti og galla þess að skilgreina hringveg 2 um Vestfirði var sá kostur fyrst skoðaður og starfshópurinn taldi að skilgreining Hringvegar 2 gæti orðið öflugt markaðstæki fyrir Vestfirði, jafnað búsetuskilyrði og stuðlað að auknum ferðamannastraumi. Það væri þó ljóst að nafnabreyting ein og sér væri ekki nægjanleg til að ýta undir aukið viðhald og vetrarþjónustu og væri auk þess líklegt til að skapa væntingar um betri vegi en þeir tilteknu vegkaflar geta staðið undir.

Starfshópurinn telur að vörumerkið „Vestfjarðaleiðin“ sé sterkara en Hringvegur 2 fyrir Vestfirði og því væri vegnúmerið 2 ekki brýnt fyrir ferðaþjónustu á svæðinu.

Niðurstaða starfshópsins er því eins og áður segir sú að í stað þess að breyta fimm vegnúmerum á Vestfjörðum í Hringveg 2 verður tveimur meginvegnúmerum breytt í Hringveg 1. Þannig verði Vestfirðir ekki lengur eina heila landssvæðið á Íslandi sem Hringvegurinn (þjóðvegur 1) liggur um.

Fróðleikur um vegnúmer

Vegnúmer eru sérstök númer sem auðkenna vegi og flokka þá eftir mikilvægi. Íslenska vegnúmerakerfið byggist á því að aðalvegurinn um landið er númer 1 sem upphaflega var kallaður þjóðvegur 1 en hefur síðar fengið nafnið Hringvegurinn. Síðan eru átta númerasvæði hringinn í kringum landið réttsælis frá Skeiðarársandi á Suðurlandi að Austurlandi. Fyrsti stafur númera á hverju svæði er sá sami og byrja á 2-9. Síðan er fjöldi tölustafa í númerinu ákvarðaður af mikilvæg vegar. Hringvegurinn er eini vegurinn með einn tölustaf, tveir tölustafir tákna helstu aðalvegi og þrír tölustafir tákna aðra helstu vegi innan hvers svæðis. Vegir sem liggja um fjöll og hálendi, fá F merkingu fyrir framan vegnúmer, teljist þeir ófærir fólksbílum.

Megintilgangur Hringvegarins (þjóðvegar 1) er að tengja saman landshluta í eina samfellda heild með einum aðalvegi. Hlutverk hans er að tryggja grunnsamgöngur íbúa, ferðafólks, vöruflutninga og þjónustu milli landshluta. Hringvegurinn (þjóðvegur 1) á að vera burðarás atvinnulífs með flutningi fólks og farms.

Í vegnúmerkerfinu sjálfu felast sjálfstæð tök gegn því að hringvegur um Vestfirði fengi númerið 2. Rökréttast hefði þá verið að slíkur hringvegur fengi tölustafinn 6 þar sem vegir á svæðinu bera allir tveggja og þriggja stafa númer sem byrja á 6.

Um starfshópinn

Innviðaráðherra skipaði starfshópinn í september 2025. Í starfshópnum sátu:

• Valtýr Þórisson, formaður, tilnefndur af Vegagerðinni
• Valgerður Gréta Benediktsdóttir, innviðaráðuneyti
• Hólmfríður Sveinsdóttir, innviðaráðuneyti
• Sigríður Ólöf Kristjánsdóttir, tilnefnd af Fjórðungssambandi Vestfirðinga
• Jón Árnason, tilnefndur af Fjórðungssambandi Vestfirðinga

Starfshópurinn átti m.a. fundi með sérfræðingum hjá Vegagerðinni og sviðsstjóra Markaðsstofu Vestfjarða hjá Vestfjarðastofu.

• Skoða minnisblað starfshóps um hringveg um Vestfirði (mars 2026)