28. janúar 2025Þrjú tilboð bárust í nýbyggingu Vestfjarðavegar (60) um Dynjandisheiði
Þrjú tilboð bárust í nýbyggingu Vestfjarðavegar (60) um Dynjandisheiði
Þrjú tilboð bárust í nýbyggingu 3. áfanga Vestfjarðavegar (60) sem felur í sér gerð um 7,2 kílómetra langan kafla og auk þess um 0,8 kílómetra kafla á Dynjandisvegi (621). Í verkinu er jafnframt gert ráð fyrir uppbyggingu keðjunarplans sem ætlað er að auka öryggi ökumanna yfir vetrartímann, auk áningarstaðar fyrir ferðamenn sem sækja svæðið í síauknum mæli.
Tilboðin voru opnuð í dag að viðstöddum fulltrúum Vegagerðarinnar, en þar sem verkið var auglýst á Evrópska efnahagssvæðinu stóð erlendum fyrirtækjum einnig til boða að bjóða í framkvæmdina. Samkvæmt Vegagerðinni berast yfirleitt fjölbreytt tilboð þegar slík verk eru boðin út, enda er um að ræða stórt og mikilvægt verkefni fyrir samgöngur á Vestfjörðum.
Markmið framkvæmdarinnar er að bæta samgöngur og öryggi á einni erfiðustu leið landsins, þar sem vegir hafa hingað til verið mjóir, snjóþungir og viðkvæmir fyrir veðrum. Með nýjum og öruggari vegkafla verður tryggt betra aðgengi milli byggðarlaga auk þess sem ferðatími styttist verulega. Þetta hefur mikið að segja bæði fyrir íbúa og atvinnulíf á Vestfjörðum, auk þess sem ferðaþjónusta á svæðinu mun njóta góðs af bættri aðkomu að náttúruperlum eins og Dynjanda og öðrum vinsælum áfangastöðum.
Að sögn Vegagerðarinnar hefur mikil áhersla verið lögð á að nýi vegurinn verði byggður upp í samræmi við nútímakröfur um öryggi og burðargetu, og að hann falli sem best að landslagi svæðisins. Þar skiptir ekki síst máli að lágmarka rask á viðkvæmu náttúruumhverfi, en jafnframt tryggja varanlega lausn sem stenst bæði veður og álag þungaflutninga.
Samkvæmt útboðsskilmálum skal verkinu vera lokið að fullu fyrir 30. september 2026. Þar með verður stigið enn eitt mikilvægt skrefið í áfangaskiptum framkvæmdum við Vestfjarðaveg, sem á endanum mun gjörbreyta aðgengi að Vestfjörðum og styrkja samgöngur á milli svæða sem lengi hafa þurft að sæta erfiðum samgönguskilyrðum.
Tilboð bárust frá Ístaki, Suðurverki og Borgarverki. Borgarverk átti lægsta tilboðið, sem er tæplega 16% undir áætluðum verktakakostnaði.
Bergþóra Þorkelsdóttir, forstjóri Vegagerðarinnar, segir ánægjulegt að fá samkeppnishæf tilboð en Vegagerðin mun nú fara yfir tilboðin, þar sem meðal annars verður kannað hvort þau standist útboðsskilmála. Að því loknu verður gengið til samninga og því næst hefst undirbúningur fyrir framkvæmdir.
Sjá nánar hér:
https://www.vegagerdin.is/verkefnin/utbod/vestfjardavegur-60-um-dynjandisheidi-3-afangi
Tölvugerð mynd af fyrirhuguðum framkvæmdum.
Tölvugerð mynd af fyrirhuguðum framkvæmdum.