18. nóvember 2022

Kynn­ingar­fundur vegna fram­kvæmda á Stranda­vegi um Veiði­leysu­háls

Markmið framkvæmda er að bæta samgöngur á Vestfjörðum og hafa þar með jákvæð og varanleg áhrif á samfélagið, atvinnulíf og daglegt líf íbúa svæðisins. Með nýjum vegi um Veiðileysuháls verða samgöngur í Strandasýslu bæði áreiðanlegri og öruggari, óháð árstíma eða veðuraðstæðum. Nýr vegur verður með bundnu slitlagi (klæðingu) og uppbyggður með hliðsjón af snjóalögum og þeim aðstæðum sem einkenna svæðið yfir vetrartímann. Að loknum framkvæmdum verður mögulegt að halda veginum milli Bjarnarfjarðar og Djúpavíkur opnum allan ársins hring, svo fremi sem ferðaveður leyfir og snjóaðstæður eru viðráðanlegar.

Vegagerðin hefur nú lagt fram umhverfismatsskýrslu fyrir nýjan Strandaveg um Veiðileysuháls í Árneshreppi og býður almenningi að kynna sér innihald hennar og veita umsagnir.

Vegagerðin minnir á að tillaga að ofangreindri framkvæmd og umhverfismatsskýrsla liggur frammi til opinberrar kynningar frá 2. nóvember til 14. desember 2022, bæði hjá Verzlunarfjelagi Árneshrepps á Norðurfirði og hjá Skipulagsstofnun.

Sjá nánar um skýrsluna og tengd gögn hér á vef Vegagerðarinnar.
Umhverfismatsskýrslan er einnig aðgengileg á vef Skipulagsstofnunar:
🌐 www.skipulag.is