Skil­málar vefþjón­ustur

Gildissvið 

Skilmálar þessir gilda um öll gögn og ljósmyndir sem Vegagerðin birtir á vefsíðum sínum og gagnaþjónum, nema annað sé sérstaklega tekið fram. 

Með gögnum er átt við upplýsingar og skrár tengdar vegakerfinu, færð, umferðartölum, ástandi og gerð vega, staðsetningargögnum (landupplýsingar), kortum, myndavélum, veðurupplýsingum á vegum, mælingum og öðrum afleiddum gögnum í eigu Vegagerðarinnar. 

Með notkun efnis sem hefur verið gert aðgengilegt á vefþjónustu Vegagerðarinnar telst þú hafa samþykkt eftirfarandi skilmála og skilyrði. Vanrækir þú hins vegar að fara eftir skilmálum þessum falla réttindi þín sjálfkrafa niður. 

Afnot gagna 

Öll gögn Vegagerðarinnar sem gerð eru aðgengileg eru gefin út samkvæmt hinu alþjóðlega Creative Commons afnotaleyfi,  CC BY 4.0, í samræmi við lög um endurnot opinberra upplýsinga nr. 45/2018. 

Skilyrði fyrir notkun gagna 

Við hvers kyns birtingu, dreifingu, framsetningu eða þróun sem byggir á gögnum Vegagerðarinnar, ber notanda að tilgreina uppruna gagna í samræmi við 2. tölul. 1. mgr. 4. gr. laga nr. 45/2018 og skilmála CC BY 4.0 leyfisins. 

Við tilvísun skal koma fram: 

• Nafn leyfisgjafa (Vegagerðin). 
• Heiti gagnasetts eða lýsing á gögnum. 
• Dagsetning eða tímabil þegar gögnunum var hlaðið niður eða þeirra aflað. 
• Vísun til CC BY 4.0 leyfisins. 

Notanda er óheimilt að nota gögnin á þann veg að gefið sé í skyn að Vegagerðin styðji notandann sérstaklega, samþykki vinnslu hans eða mæli með ákveðinni notkun á gögnunum. 

Takmarkanir og undantekningar 

Opinber gögn samkvæmt skilmálum þessum ná ekki til eftirfarandi gagna: 

• Ritvarið efni og annað ritað mál sem birt er á vef Vegagerðarinnar nýtur verndar samkvæmt höfundalögum nr. 73/1972. Óheimilt er að breyta efnisinnihaldi slíkra skýrslna eða greinargerða. Einnig er óheimilt að breyta gögnum eða öðrum upplýsingum nema skýrt komi fram hvað sé frá Vegarðinni komið og hvað sé á ábyrgð annarra. 

• Merki og skjaldarmerki Vegagerðarinnar og íslenska ríkisins eru háð einkarétti og má ekki nota án skriflegs leyfis, nema þar sem þau eru óaðskiljanlegur hluti af birtu skjali eða korti. 

• Gögn þar sem þriðji aðili á hugverkarétt eða höfundarétt. 

Fyrirvarar 

Margar vefsíður og gagnaþjónar innihalda sjálfvirk rauntímagögn t.d. sjálfvirkar umferðartölur, veðurupplýsingar og myndavélar á vegum sem ekki hafa verið yfirfarin eða gæðastýrð af sérfræðingum. Þessi gögn geta breyst án fyrirvara. 

Vegagerðin ber enga ábyrgð á því hvort gögn á gagnasvæðum eða vefþjónustum hennar henti til þeirra nota sem notandi eða viðskiptavinur ætlast til. Gögnin eru afhent eins og þau eru hverju sinni. 

Vegagerðin ábyrgist ekki áframhaldandi eða truflunarlaust aðgengi að gögnum eða vefþjónustum og áskilur sér rétt til að takmarka, breyta eða loka aðgangi án fyrirvara. 

Vegagerðin ber enga ábyrgð á beinu eða óbeinu tjóni, tapi þ.m.t. rekstrartapi eða glötuðum hagnaði, meiðslum eða skaða sem hljótast kann af notkun gagna, afleiddra gagna eða bilun í gagnaþjónustum. Að öðru leyti undanskilur Vegagerðin sig fyrirsvari, ábyrgð, skyldum og skaðabótakröfum að því marki sem lög heimila. 

Lokanir vega og umferðaröryggi 

Vegna aðgerða íslenskra stjórnvalda til að koma í veg fyrir akstur utan vega, vernda náttúru landsins og takmarka eða koma í veg fyrir umferð á ákveðnum svæðum eða vegum (t.d. vegna aurbleytu, snjóflóðahættu, veðurs eða eldgosa), áréttar Vegagerðin að notendur afhentra gagna bera sjálfir alla ábyrgð á að fylgjast með og virða opinberar tilkynningar og lokanir vega og slóða. 

Slíkar tímabundnar eða varanlegar aðgerðir og ákvarðanir stjórnvalda ganga ávallt framar þeim upplýsingum um vegi, slóða og færð sem finna má í sjálfvirkum gagnagrunnum eða eldri útgáfum gagna Vegagerðarinnar hverju sinni.