Almyrkvi á sólu 2026
Almyrkvi á sólu er ein stórfenglegasta sýning náttúrunnar. Þann 12. ágúst 2026 gengur almyrkvi yfir Norðurskautið, Grænland, Ísland, Portúgal og Spán, en deildarmyrkvi sést víða í Norður-Ameríku, Skandinavíu, Evrópu og Vestur-Afríku.
Almyrkvi á sólu 2026
Á Íslandi fer mjó almyrkvaslóð yfir vestasta hluta landsins. Alskuggi tunglsins snertir fyrst land við Straumsnesvita á Hornströndum kl. 17:43:28 og stendur þar í 1 mínútu og 26 sekúndur. Lengst verður myrkvinn við Látrabjarg, um 2 mínútur og 13 sekúndur.
Skuggi tunglsins ferðast yfir jörðina á um 3400 km hraða á klukkustund og færist yfir Snæfellsnes, Reykjavík og Reykjanesskaga áður en hann yfirgefur landið við Reykjanestá kl. 17:50:07. Þar varir almyrkvinn í um 1 mínútu og 47 sekúndur.
Í heild stendur almyrkvinn yfir á Íslandi í um 6 mínútur og 48 sekúndur. Þaðan heldur skugginn áfram suður yfir Atlantshafið og nær til Spánar um 35 mínútum síðar, þar sem almyrkvi verður við sólsetur á Mallorca.
Kort og myndefni
Umferðarstýring
Vegna almyrkvans sem verður sýnilegur á Íslandi 12. ágúst 2026 er búist við verulegri aukningu í umferð á ákveðnum svæðum landsins. Til að tryggja öryggi vegfarenda og greiða fyrir umferð verður gripið til tímabundinnar umferðarstýringar á nokkrum vegum Vegagerðarinnar.
Lögregla bendir á að ökutækjum sem er lagt ólöglega, eða sem hefta för, verða fjarlægð á kostnað eiganda.
⚠️ Mikilvægar upplýsingar um umferðarstýringu
Umferðarstýringin hefst fyrst klukkan 8:00 þann 12. ágúst 2026 og stendur fram yfir atburðinn, eftir því sem þörf krefur.
Mismunandi er hvenær umferðarstýringin hefst en það verður á bilinu 08:00 – 11:00 eftir hvar á landinu það er.
Gera má ráð fyrir að hámarkshraði verði lækkaður
á þessum degi. Vegfarendur eru hvattir til að sýna þolinmæði og
gera ráð fyrir lengri ferðatíma.
Höfuðborgarsvæðið
Á gagnvirka kortinu á solmyrkvi2026.is má sjá
allar götulokanir og helstu safnsvæði á höfuðborgarsvæðinu.
Safnsvæðin eru valin þar sem búast má við miklum fjölda fólks ef veður verður gott.
Seltjarnarnes
Suðurströnd
Suðurströnd verður lokuð fyrir bílaumferð frá Vivaldi-velli og
sundlauginni að austanverðu og við Lindarbraut og Nesbala að vestanverðu
frá kl. 15.00 til 19.00.
Allar þvergötur sem liggja að Suðurströnd verða einnig lokaðar.
Bílastæði: Bent er á bílastæði við sundlaugina,
Austurströnd og Eiðistorg.
Norðurströnd
Lokað verður fyrir akstur um Norðurströnd vestan Lindarbrautar frá
kl. 15.00 til 19.00.
Bílastæði: Bent er á bílastæði við Austurströnd og
Eiðistorg.
Grótta – lokað fyrir umferð
Ekki er leyfilegt að fara út í Gróttu þann 12. ágúst.
Flóð er á meðan almyrkvinn stendur.
Akstursleiðin út að Gróttu verður lokuð við Lindarbraut frá
kl. 15.00 til 19.00.
Reykjavík
Suðurgata
Suðurgata verður lokuð fyrir akstri við Hringbraut frá
kl. 15.00 til 20.00.
Allar þvergötur Suðurgötu verða einnig lokaðar, nema Þorragata.
Um Þorragötu verður áfram opið fyrir umferð í Skerjafjörð.
Ægisíða og nærliggjandi götur
Ægisíða verður lokuð fyrir bílaumferð við Hofsvallagötu, Fornhaga og
Dunhaga frá kl. 15.00 til 20.00.
Einnig verður lokað fyrir bílaumferð við Lynghaga og Starhaga á sama tíma.
Garðabær
Álftanes
Einstefnuakstur (hringakstur) verður um Álftanes frá kl. 15:00 til kl. 20:00 í norður- og vesturátt, um Norðurnes- og Suðurnesveg. Hámarkshraði verður tekinn niður í 30 km/klst á hluta Suðurnesvegar.
Viðbótarbílastæði verða útbúin við óbyggðar lóðir í Gásamýri og Svanamýri, auk þess sem hægt verður að leggja í grennd við íþróttamiðstöðina.
Kópavogur
Ekki er gert ráð fyrir götulokunum í Kópavogi.
Hafnarfjörður
Ekki er gert ráð fyrir götulokunum í Hafnarfirði.
Búast má við þungri umferð um Reykjanesbraut í átt að Reykjanesbæ.
Echolalia-ravehátíð Bjarkar og Smekkleysu fer fram á Víðistaðatúni.
Reykjanes
Á Reykjanesi verður umferðarstýring á eftirfarandi vegum:
Garðskagavegur (45) frá Nesvegi að Sandgerði, einstefna frá kl. 11:00
– Sveitarfélagið verður með viðburð við Garðskagavita og af þeim sökum verður einstefna frá gatnamótum Garðskagavegar (45) og Skagabrautar að golfvelli.
Vatnsleysustrandarvegur (420) frá Vogum að Kúagerði, einstefna frá kl. 11:00
Þessar ráðstafanir eru gerðar til að stýra aukinni umferð á svæðinu þar sem búist er við miklum fjölda gesta sem vilja fylgjast með almyrkvanum.
Smellið á kortin til að stækka
Bláalónsvegur (426) verður lokaður almennri umferð frá kl. 11:00 til 23:00
Höskuldarvallavegur verður lokaður.
Vigdísarvallarvegur (428) verður opinn, lögregla og björgunarsveitir verða með eftirlit.
Öllum ökutækjum sem lagt er ólöglega eða sem að hefta för verða fjarlægð af lögreglu á kostnað eigenda.
Snæfellsnes
Útnesvegur (574). Einstefna verður frá Búðum að vegamótum við Öndverðanesveg frá kl. 09:00.
Öndverðarnesvegur (579) lokaður en boðið verður upp á rútuferðir fyrir þá sem vilja, á vegum Snæfellsjökulsþjóðgarðs.
Dalabyggð
Einstefna verður á Klofningsvegi (590) frá kl. 09:00.
Vestfirðir
Á Vestfjörðum verða eftirfarandi vegir með tímabundna einstefnu:
Örlygshafnarvegur (612) frá kl. 08:00.
Rauðasandsvegur (614) frá kl. 08:00.
Lögregla mun hafa eftirlit á svæðinu frá kvöldi hins 11. ágúst og fylgjast með hversu margir eru á leið inn á svæðið – komið getur til þess að fjöldi verði takmarkaður.
Lokunarpóstur verður settur upp við gatnamót Barðastrandarvegar (62) og Örlygshafnarvegar (612) eigi síðar en kl. 08:00 að morgni 12. ágúst. Lokun gæti þó orðið fyrr ef aðstæður krefjast.
Einstefna verður á veginum fram að viðburði.
Rútur að stærð allt að 19+1 farþega mega aka um veginn. Stærri ökutækjum verður ekki heimilt að aka um veginn þann 12. ágúst.
Hámarkshraði verður:
- 60 km/klst. að Breiðuvík
- 50 km/klst. frá Breiðuvík að Látrabjargi vegna aukinnar gangandi umferðar á svæðinu
Stranglega er bannað að leggja ökutækjum á veginum eða á vegöxlum. Ökutæki sem lagt er ólöglega verða fjarlægð á kostnað eigenda.
Æskilegt er að setja upp sambærilega merkingu á Útnesvegi (574) á Snæfellsnesi, þar sem lögregla hyggst einnig láta fjarlægja ökutæki sem lagt er ólöglega.
Bolafjall: Lokað verður fyrir alla almenna umferð bíla og gangandi vegfarenda um Bolafjallsveg frá kl. 08:00 þann 12. ágúst af öryggisástæðum. Skipulagðar rútuferðir verða í boði frá Bolungarvík upp á fjallið og niður aftur eftir sólmyrkvann. Mæting og brottför verður við Félagsheimilið í Bolungarvík. Sjá nánar hér.
Flutningsaðilar
Vegna mikils umferðarálags sem búast má við á vesturhelmingi landsins miðvikudaginn 12. ágúst í tengslum við almyrkvann, beinir Vegagerðin því til flutningsaðila, vöruflutninga-, fiskflutninga- og eldsneytisfyrirtækja að takmarka akstur eins og kostur er þann dag.
Búast má við mjög mikilli umferð á helstu leiðum á Vesturlandi og Vestfjörðum, auk aukinnar hættu á töfum, þrengslum og skertu umferðaröryggi. Með því að draga úr þungaflutningum á svæðinu má stuðla að betra flæði umferðar, auknu öryggi vegfarenda og greiðari aðkomu neyðar- og þjónustuaðila ef þörf krefur.
Vegagerðin hvetur fyrirtæki og flutningsaðila til að:
- fresta flutningum ef unnt er,
- skipuleggja akstur utan álagstíma,
- takmarka ferðir um mestu álagssvæðin þann 12. ágúst.
Við þökkum flutningsaðilum fyrir samvinnu og skilning vegna þessa umfangsmikla umferðarviðburðar.
Markmið umferðarstýringar
Megintilgangur þessara ráðstafana er að tryggja greiða leið viðbragðsaðila ef neyðartilvik koma upp, þar sem búast má við mjög mikilli umferð á þessum vegum. Með skipulagðri umferðarstýringu er einnig leitast við að draga úr hættu á umferðarteppum og bæta öryggi allra vegfarenda.
Samstarf við viðbragðsaðila
Skipulagning og framkvæmd umferðarstýringarinnar er unnin í nánu samstarfi við lögreglu og aðra viðbragðsaðila á viðkomandi svæðum. Vegfarendur eru hvattir til að fylgja leiðbeiningum lögreglu og umferðarstjórnenda og sýna aðgát á svæðunum.
🚧 Markmið umferðarstýringar:
Að tryggja greiða leið viðbragðsaðila, draga úr umferðarteppum og auka öryggi vegfarenda þar sem búast má við mikilli umferð vegna almyrkvans.
Myndefni
