Við Jökulsárlón og sjóvörn
- TegundVegir
- StaðaKynningargögn
- Markmið
- Greiðar samgöngurÖruggar samgöngur
- Heimsmarkmið
- 9. Nýsköpun og uppbygging11. Sjálfbærar borgir og samfélög
- Flokkar
- StofnvegirEndurbæturÖryggisaðgerðir
- Svæði
- Suðausturland
Fyrirhugað er að ný- og endurbyggja Hringveg á 2,7 km löngum kafla vestan Jökulsár á Breiðamerkursandi í Sveitarfélaginu Hornafirði. Þar af verður núverandi vegur endurbyggður á 0,8 km löngum kafla en nýr vegur lagður á 1,9 km kafla, þar sem Hringvegurinn verður færður fjær sjónum. Hluti nýs vegar, eða 0,6 km, er bráðabirgðavegur til að tengja veginn við núverandi brú á Jökulsá. Í tengslum við framkvæmdina verður byggður 250 m langur sjóvarnargarður meðfram sjónum þar sem núverandi Hringvegur liggur næst honum og sjávarrof hefur verið hvað mest á seinustu árum.
Á seinustu árum hefur ströndin við Jökulsárlón í Vatnajölkulsþjóðgarði smám saman færst innar. Nú er svo komið að nauðsynlegt er að grípa til aðgerða til að tryggja öryggi þeirra sem leið eiga um Hringveginn. Það verður gert með sjóvörn og færslu Hringvegarins.
Miklar breytingar hafa átt sér stað við Jökulsá á Breiðamerkursandi frá því áin var brúuð árið 1967. Jökulsárlón hefur margfaldað stærð sína og farvegur Jökulsár, sem er 100 m breiður, hefur viljað rýmka sig. Þá er einnig mikið álag á rofvarnir vegna jakaburðar úr Jökulsárlóni niður eftir farveginum, auk strandrofs af ágangi sjávar. Því hefur stöðugt þurft að viðhalda grjótvörnum í farvegi til að sporna við þeirri þróun. Þess má geta að árið 1992 var Hringvegurinn færður á þeim kafla um 80 m innar í landið og er sá hluti hans nú horfinn í sjóinn.
Upphafleg tilkynning Vegagerðarinnar tók til færslu Hringvegarins við Jökulsárlón auk byggingar sjóvarnar við sjávarströndina. Við meðferð málsins komu fram frekari upplýsingar í tengslum við færslu vegarins sem þörfnuðust nánari skoðunar. Óskaði Vegagerðin í kjölfarið eftir því að tekin yrði matsskylduákvörðun um sjóvörnina eingöngu. Sjóvörnin er nauðsynleg til að verja núverandi veg fyrir ágangi sjávar og mikilvægt að hefja framkvæmdir sem fyrst. Tímasetning á færslu Hringvegarins liggur ekki fyrir en framkvæmdin er ekki á samgönguáætlun. Skipulagsstofnun féllst því á þá beiðni Vegagerðarinnar og tekur þessi ákvörðun eingöngu til sjóvarnarinnar. Framkvæmd ekki háð mati á umhverfisáhrifum.
