Lamb­eyrar – Sýslu­mörk

Núverandi vegsvæði Laxárdalsvegar er 6 m breitt til beggja handa frá miðlínu vegar, eða samtals 12 m breitt. Endurbygging vegarins verður alfarið í vegstæði núverandi vegar. Vegurinn verður 6,5 m breiður með 6,3 m breiðu bundnu slitlagi. Nýtt vegsvæði endurbyggðs vegar verður 15 m breitt til beggja handa frá miðlínu vegar, eða samtals 30 m breitt. Veglína vegarins mun fylgja núverandi veglínu. Planlega vegarins verður því óbreytt þó svo hæðarlega breytist að einhverju leyti og blindhæðir teknar af. Hönnunarhraði verður 90 km/klst.

Á vegkaflanum eru þrjár einbreiðar brýr yfir Hólkotsá, Laxá í Dölum og Laxá í Hrútafirði. Brýrnar yfir Laxá í Dölum og Laxá í Hrútafirði munu standa áfram óbreyttar. Brúin yfir Hólkotsá verður rifin og í hennar stað byggt hálfbogaræsi yfir ána. Á núverandi vegi eru 2 vegtengingar, að Svalhöfða og Sólheimum, og verða þær aðlagaðar að endurbættum vegi. Þá eru nokkrar útafkeyrslur á vegslóða, margar hverjar tengdar laxveiði, sem einnig verða aðlagaðar að endurbættum vegi.

Hönnunarforsendur miða við að árdagsumferð (ÁDU) fari úr 140-160 bílum árið 2019 í 334-395 bíla árið 2039. Skiltaður hámarkshraði verður 90 km/klst.

Laxárdalsheiði er tilnefnd á B-hluta náttúruminjaskrár vegna fuglalífs og er svæðið talið alþjóðlega mikilvægt sem varpsvæði álftar og himbrima. Vegur yfir Laxárdalsheiði liggur um framangreint svæði á um 10 km kafla. Fyrirhugaðar endurbætur á veginum munu ekki hafa áhrif á verndarsvæðið þar sem þær munu hvorki skerða búsvæði né farleiðir fuglanna.