Árbúð­ir-Kerl­ingar­fjalla­vegur (F347)

Stór hluti Kjalvegar er malarvegur, eða tæplega 150 km af 167,7 km. Þar af eru rúmlega 53 km niðurgrafinn, krókóttur og sums staðar mjór malarvegur, þar með talinn kaflinn sem þessi framkvæmd gengur út á. Rúmlega 107 km Kjalvegar hafa verið byggðir upp, þar af eru tæplega 19 km með bundnu slitlagi. Vegagerðin hefur þurft að draga úr viðhaldi á Kjalvegi á seinustu 6-7 árum, á sama tíma og mikil fjölgun ferðamanna um hann hefur átt sér stað. Við aðstæður eins og á Kili er hámarksendingartími malarslitlags 2 ár, því að hluti þess fýkur í burtu í þurrkum og vindi.

Til að gera viðhald auðveldara hefur verið unnið að því á undanförnum árum að styrkja Kjalveg og byggja hann lítillega upp úr landi, þó aðeins á stuttum köflum í senn. Aðferðafræðin byggist fyrst og fremst á því að ná vegyfirborði aðeins upp úr landinu til þess að vegurinn virki ekki eins og árfarvegur þar sem vatnið situr í, og rennur eftir honum. Þessi uppbygging er gerð með burðarhæfu efni þannig að vegurinn nær að afvatna sig og verður þannig mun auðveldari í þjónustu og ver sig betur gegn vatni, auk þess sem aurbleyta að vori verður minni. Þessar endurbætur eru ætlaðar því að hægt verði m.a. að opna veginn fyrr að vori.