Kárastað­ir – Skarð

Útboðsverkið er á Vatnsnesi vestanverðu, við Miðfjörð í Húnaþingi vestra. Vegkaflinn liggur um lönd jarðanna Ytri-Kárastaða, Syðri-Ánastaða 1 og 2, Ytri-Ánastaða, Bólstaða og Skarðs.

Verkið fólst í endurbyggingu Vatnsnesvegar (711) á um 7,1 km löngum kafla, frá núverandi slitlagi við Ytri-Bæjarlæk norðan Kárastaða og norður fyrir Krossavallalæk norðan við Skarð. Fyrri vegur var um 4,5 – 5,5 m breiður malarvegur og var hann breikkaður í 6,0 m breiða akbraut með 0,5 m breiðum öxlum. Vegurinn var endurbyggður að mestu leyti í vegstæði núverandi vegar og hliðraðist aðeins lítillega, nema við bæinn Skarð og norðan við Skarðsá þar sem hann hliðraðist um allt að 15 m. Á nokkrum stöðum var hann hækkaður lítillega eða lækkaður en mest var hann lækkaður á um um 300 m kafla norðan við Skarðsá.

Vatnsnesvegur er 70 kílómetra malarvegur frá Hvammstanga og út fyrir Vatnsnes. Vegurinn hefur verið til umfjöllunar síðustu ár enda ástand hans oft slæmt, ekki síst í vætutíð. Nokkur umferð er um veginn, íbúar á Vatnsnesi fara um hann daglega, meðal annars skólabíll, og ferðamenn aka hann til að skoða til dæmis Hvítserk og seli. Umferðin á þessum slóðum var árið 2021 um 148 bílar á sólarhring yfir allt árið, en yfir sumartímann óku þar um 272 bílar á sólarhring. Vegagerðin samdi við Þrótt ehf. á Akranesi um framkvæmd verksins, en Þróttur bauð 455 milljónir króna í verkið sem var um 30 milljónum króna lægra en áætlaður verktakakostnaður.

Framkvæmdir hófust í júlí 2023.