25. júní 2026

Fjöl­menni við opnun nýs Hring­vegar (1) um Horna­fjörð

Það voru Bergþóra Þorkelsdóttir forstjóri Vegagerðarinnar, Ragnar Þór Ingólfsson starfandi innviðaráðherra og Gauti Árnason forseti bæjarráðs Hornafjarðar sem klipptu á borða til að opna veginn fyrir umferð. Nú geta því heimamenn og landsmenn allir nýtt sér styttinguna. Skærin sem ráðherra notaði eigar sér langa sögu, Bergþóra rakti þá sögu í ávarpi sínu: “

Þegar brúin yfir Hornafjörð var vígð árið 1961 kom babb í bátinn því gleymst hafði að taka með skæri til að klippa á borða. Þá leitaði Þrúðmar Sigurðsson í Hoffelli til viðstaddra um hvort einhver væri með skæri á sér. Það vildi svo til að þá eins og í dag sáu kvenfélagskonur í sveitinni um veitingarnar og ein félagskona, Sigurborg Gísladóttir frá Brunnum, var með saumaskærin sín meðferðis sem síðan fengu þetta mikilvæga verkefni. Skærin hafa síðan varðveist í fjölskyldu hennar og þessi saga fylgt þeim alla tíð.

Þegar okkur buðust skærin til borðaklippingarinnar gripum við það fegins hendi en líklega eru fá skæri sem hafa tvívegis fengið svo glæsilegt verkefni.“

Ráðherra fagnaði þessu mikla verki og leit einnig til framtíðar: “

Þegar við horfum hér yfir og erum um það bil að taka þessa nýju leið í notkun er mikilvægt að hafa hugfast að hér er um að ræða meira en bara röð malbiks og steypu. Það sem við vígjum hér í dag er jafnframt tákn um framfarir, samstöðu og framtíðarsýn. Þetta er dæmi um það sem við getum gert þegar við vinnum saman, ríkisvaldið, sveitarfélög, verktakar og samfélagið allt.

Í dag fögnum við áfanga sem hefur lengi verið beðið eftir. En við lítum líka fram á veginn. Verkefnin eru mörg, þörfin er mikil en nú höfum við ný verkfæri til að takast á við þau. Alþingi samþykkti nýverið samgönguáætlun þar sem áform eru uppi um umfangsmiklar samgöngubætur víðsvegar um land. Ríkisstjórnin er staðráðin í því að fjárfesta í innviðum landsins, í vegakerfinu, með það að markmiði að efla öryggi fólks og atvinnutækifæri.“

Að vanda við opnanir á vegum, brúm eða göngum standa tveir Vegagerðarmenn sem heiðursmenn og aðstoða skæravörð sem iðulega kemur af staðnum og er í yngri kantinum. Það var hún Klara Björt Þorsteinsdóttir sem sinnti því hlutverki en heiðursmenn voru afi hennar Þorleifur Olsen og Jón Kristófer Guðbjörnsson, báðir starfsmenn þjónustustöðvarinnar á Höfn og reyndar Gauti Árnason líka.

Það var síðan Ragnar Þór sem settist upp í vörubifreið árgerð 1956 við hlið Reynis Gunnarssonar sem ók, en hann var þjónustustjóri hjá Vegagerðinni í áratugi. Bergþóra minntist á það að einmitt þessi vörubíll Ford Köln árgerð 1956 hafði verið notaður við vegagerðina og brúarsmíði gömlu brúarinnar yfir Hornafjarðarfljót sem var opnuð 1961.

Leiðin lá að félagsheimilinu í Holti þar sem Ingibjörg Sveinsdóttir forseti bæjarstjórnar stýrði fundi og veitingum. Axel Viðar Hilmarsson verkefnisstjóri þessa stóra verkefnis fyrir hönd Vegagerðarinnar fór yfir forsöguna og það sem í verkinu fólst. Sjá einnig frétt um verkið. Karl Andreassen forstjóri Ístaks sem vann þennan síðasta hluta verksins tók einnig til máls, hann benti á að ýmislegt hefði gengið á í verkinu sérstaklega veðurfarslega en verkið væri gott og Ístaks menn væru ákaflega stoltir af því, hann óskaði heimamönnum og landsmönnum öllum til hamingju með nýja veginn og brýrnar fjórar.