11. september 2020

Dynj­andis­heið­in – skrif­að undir verk­samn­ing

Byrjað verður á verkinu við Þverdalsá sem rennur í Pennu og er gert ráð fyrir að verktakinn komi sér fyrir á svæðinu og hefji fyrstu framkvæmdir um mánaðamótin september og október. Þar munu sprengingar fara fram til að rýma fyrir nýjum vegarkafla, en að sögn Vegagerðarinnar er það liður í nauðsynlegum undirbúningi áður en hefst handa við sjálfa veglagninguna.

Fyrsti áfanginn er mikilvægur hluti af heildarverkefninu sem miðar að því að bæta samgöngur milli norðan- og sunnanverðra Vestfjarða. Núverandi vegur um Dynjandisheiði hefur lengi verið torfær á vetrum, enda liggur hann hátt yfir sjó og er snjóþungur og viðkvæmur fyrir veðrum. Með nýjum vegi verður bæði akstursöryggi aukið og samgöngur á svæðinu gerðar mun greiðfærari allt árið um kring.

Samkvæmt Vegagerðinni er lagning vegarins ekki aðeins mikilvæg fyrir íbúa svæðisins, heldur einnig fyrir atvinnulíf og ferðaþjónustu á Vestfjörðum. Nýr vegur mun stytta leiðir, auðvelda aðgengi og stuðla að auknum stöðugleika í samgöngum sem hefur verið eitt helsta hagsmunamál íbúa í áratugi.

Áætlað er að vinna við fyrsta áfangann standi yfir næstu misseri og að verkið verði unnið í nánu samstarfi Vegagerðarinnar, verktakans og heimamanna.

Um er að ræða verkið Vestfjarðavegur (60) um Dynjandisheiði, 1. áfangi og felst það í nýbyggingu Vestfjarðarvegar á um 10 km kafla. Verkið skiptist í tvo kafla. Annars vegar um 5,7 km langan kafla við Þverdalsá (vegkafli 60-35) og hins vegar um 4,3 km langan kafla fyrir Meðalnes (vegkafli 60-38). Vegurinn við Þverdalsá er að mestu leyti byggður í nýju vegstæði en að hluta til í núverandi vegstæði og liggur svo niður Penningsdalinn. Vegurinn fyrir Meðalnes er alfarið byggður í nýju vegstæði. Þverdalsáin rennur í Vatnsfjörð í Pennudal – ofan við Flókalund  en Meðalnesið er innst í Arnarfirði þar sem er Borgarfjörður og kaflinn byrjar nálægt Mjólkárvirkjun.

Við undirskrift samningsins sagði Sigurður Ragnarsson forstjóri ÍAV hf. að honum litist mjög vel á þetta verk og þar sem hann hefði nýverið ekið þessa leið myndi hann fagna því að geta í framtíðinni ekið þar um á hreinum bíl. Bergþóra Þorkelsdóttir forstjóri Vegagerðarinnar sagði að ánægjulegt væri að hægt væri að fara í vegalagningu um Dynjandisheiði um leið lokið væri við gerð Dýrafjarðarganga en á tímabili var þessi vegagerð ekki áætluð fyrr en nokkuð seinna. Það mun því fela í sér að fjárfestingin í göngunum mun nýtast betur mun fyrr en ella.

Unnið verður við verkið í allan vetur ef aðstæður leyfa en samkvæmt verkáætlun á útlögn efra lags klæðingar að vera lokið 31. ágúst 2021. Verkinu skal síðan að fullu vera lokið 30. september 2021.

Auk forstjóranna Bergþóru Þorkelsdóttur og Sigurðar Ragnarssonar má sjá á neðstu myndinni þá Hauk Magnússon og Einar Hrafn Hjálmarsson frá ÍAV og Gunnar Sigurgeirsson og Sigurþór Guðmundsson frá Vegagerðinni.