Um Búlandsá og Teigar­horn

Til að auka öryggi og bæta jákvæða upplifun á ferðamannasvæðinu á Teigarhorni var við breytinguá Aðalskipulagi Djúpavogshrepps 2008-2020 gert ráð fyrir færslu Hringvegar þar sem hann er nærri bæjarstæði Teigarhorns og fyrir Eyfreyjunesvík. Ekki er um styttingu að ræða á vegkaflanum heldur fyrst og fremst vegabætur sem stuðla að öruggari vegi og aukinni greiðfærni samgangna.

Núverandi brú á Búlandsá var byggð árið 1956. Brúin er 18 m löng og 3,8 m breið og er því einbreið, en auk þess er aðkoman að brúnni ekki talin uppfylla öryggiskröfur. Enn fremur er vegurinn talinn liggja of nálægt bæjarstæði Teigarhorns, eða aðeins í um 50 m fjarlægð frá íbúðarhúsi og innan við 30 m fjarlægð frá útihúsum. Við Teigarhorn liggur vegurinn einnig hátt í landi sem hefur í för með sér mjög bratta aðkomu að hlaði og íbúðarhúsi. Allir þessir liðir verða til þess að ráðast þarf í endurbætur á vegkaflanum.

Nýr vegur verður gerður samkvæmt hönnunarreglum um vegtegund C8, sem er 8,0 m breiður vegur með 7,0 m breiðri akbraut og 0,5 m breiðum öxlum. Vegurinn verður með bundnu slitlagi með hönnunarhraða um 90 km/klst. Planlega og hæðarlega vegarins verður löguð, en til að draga úr alvarleika útafaksturs er þörf á öryggissvæði meðfram vegum. Ný veglína fylgir núverandi vegi á 2,0 km löngum kafla en er utan hans á 2,5 km.