20. desember 2024Vetrarþjónusta á vegum til og frá Grindavík
Vetrarþjónusta á vegum til og frá Grindavík
Vegagerðin vekur athygli á að nú þegar Grindavíkurvegur hefur verið opnaður fyrir umferð á ný hefur dregið úr umferð um Krýsuvíkurveg, Suðurstrandaveg og Nesveg. Því hefur vetrarþjónusta á þessum vegum verið færð til fyrra horfs.
Á meðan Grindavíkurvegur var lokaður vegna hraunflæðis var vetrarþjónusta aukin á Krýsuvíkurvegi, Suðurstrandavegi og Nesvegi til að tryggja örugga og greiða umferð um þessar leiðir.
Nú er þjónustan komin aftur í sitt hefðbundna form, það er í 7 daga þjónustu á Grindavíkurvegi. Krýsuvíkurvegur fær tveggja daga mokstur, á föstudögum og mánudögum, fimm daga mokstur er veittur á Suðurstrandarvegi og þriggja daga mokstur á Nesvegi, nánar tiltekið á mánudögum, miðvikudögum og föstudögum.
Á Krýsuvíkurvegi, Suðurstrandarvegi og Nesvegi eru litlar hálkuvarnir í boði. Einungis er hálkuvarið á skilgreindum varasömum stöðum þar sem hætta er talin á flughálku og aðstæður sérstaklega krefjandi.