6. júlí 2026Umferðin eykst að nýju
Eftir þriggja mánaða samfelldan samdrátt jókst umferð á Hringveginum á ný í júní. Umferð var 3,6% meiri en í júní í fyrra og má rekja aukninguna að stórum hluta til verulegrar fjölgunar ökutækja um mælisnið við Úlfarsfell, sem hefur töluverð áhrif á heildarniðurstöður. Frá áramótum hefur umferð aukist um 1,0% miðað við sama tímabil í fyrra.
Hringtorg á Vesturlandsvegi.
Umferð um Suðurland (-0,6%) og Vesturland (-1,8%) dróst lítillega saman en aukning mældist á öðrum svæðum. Mest jókst umferð um mælisnið við Úlfarsfell (9,5%) en mestur samdráttur varð um mælisnið á Mývatnsöræfum (-4,2%).
Umferð frá áramótum
Nú hefur umferðin aukist um 1,0%, frá áramótum, borið saman við sama tímabil á síðasta ári. Þessi aukning verður að teljast lítil sé hún t.d. borin saman við meðalaukningu, á árabilinu 2022 – 2025 (4,8%).
Umferð vikudaga
Frá áramótum hefur umferð aukist á þriðjudögum (3,0%), miðvikudögum (3,2%), laugardögum (0,1%) og sunnudögum (3,6%) en dregist saman á mánudögum (-2,1%), fimmtudögum (-0,1%) og föstudögum (-1,0%). Mest er ekið á föstudögum en minnst á laugardögum.
Horfur út árið 2026
Spálíkan umferðardeildar Vegagerðarinnar gerir ráð fyrir að umferð muni aukast um 3,5%, það sem eftir lifir árs. Gangi sú spá eftir mun heildaraukning umferðar verða um 2,5%.
Það ber að hafa í huga að þetta spálíkan tekur ekki tillit til stöðu hagkerfisins, en vegna náinna tengsla umferðar og hagvaxtar, mun umferðin að öllum líkindum aukast í takt við þá þróun, sem bankar og stofnanir spá að verði á bilinu 1,5 – 2,5%, fyrir árið 2026.
Fyrirvari: Allar umferðartölur eru grófrýndar og geta því tekið breytingum við endanlega yfirferð.
2026/2025 | 2025/2024 | |||
Landssvæði | Milli júní mánaða | Uppsafnað frá áramótum | Milli júní mánaða | Uppsafnað frá áramótum |
Suðurland | -0,6% | -1,0% | 0,4% | 0,1% |
Höfuðborgarsvæði | 7,7% | 2,1% | -2,4% | 0,1% |
Vesturland | -1,8% | -0,6% | 5,3% | 4,7% |
Norðurland | 2,3% | 1,6% | 11,4% | 8,1% |
Austurland | 1,4% | -0,9% | 12,2% | 6,2% |
Samtals (vegið) | 3,6% | 1,0% | 1,3% | 1,7% |