2. október 2026Samningur um for- og verkhönnun gatnamóta Reykjanesbrautar og Bústaðavegar undirritaður
Skrifað var undir samning um for- og verkhönnun gatnamóta Reykjanesbrautar og Bústaðavegar, ásamt hluta af 3. lotu Borgarlínu, í dag, föstudaginn 2. október. Bergþóra Þorkelsdóttir forstjóri Vegagerðarinnar og Arnar Björn Björnsson framkvæmdastjóri exa nordic ehf. undirrituðu samninginn.
Arnar Björn Björnsson og Bergþóra Þorkelsdóttir við undirritunina.
Í byrjun júlí óskaði Vegagerðin eftir tilboði í for- og verkhönnun á endurgerð gatnamóta Reykjanesbrautar og Bústaðavegar, auk hönnunar á legu Borgarlínu frá Stekkjarbakka A-V að væntanlegri skiptistöð Borgarlínu í Vogabyggð sem staðsett verður við Súðarvog. Ráðgjafafyrirtækið exa nordic ehf. var hlutskarpast í útboðinu en alls bárust fimm tilboð.
Á leiðinni verða tvær nýjar brýr undir Vesturlandsveg við vestari kvísl Elliðaár, tvenn núverandi undirgöng sem þarf að lengja og ný brú fyrir rampa á gatnamótum við Bústaðaveg. Reykjanesbraut þarf að hliðfæra til vesturs á kafla til að forðast inngrip á verndarsvæði Elliðaárdals. Útboðið var auglýst á Evrópska efnahagssvæðinu.
Gatnamót Reykjanesbrautar og Bústaðavegar eru hluti af Samgöngusáttmála höfuðborgarsvæðisins þar sem lögð er áhersla á að bæta innviði fyrir fjölbreytta ferðamáta og skapa öruggari leiðir um höfuðborgarsvæðið. Verkefnið er unnið í samstarfi Vegagerðarinnar, Betri samgangna, Reykjavíkurborgar og Veitna.