28. maí 2025Samið við Icelandair um flug til Hornafjarðar
Vegagerðin hefur samið við Icelandair um áætlunarflug milli Reykjavíkur og Hornafjarðar árin 2025 til 2028.
Tilboðið var auglýst í mars og tilboð opnuð þann 23. apríl. Alls bárust þrjú tilboð í verkið, sem endurspegla mismunandi rekstrarforsendur og umfang þjónustu. Tilboð bárust frá eftirfarandi aðilum:
- Icelandair ehf., Reykjavík – einingaverð á sæti kr. 21.824 án VSK
- Air ehf., Garðabæ – einingaverð á sæti kr. 23.617 án VSK
- Norlandair, Akureyri – einingaverð á sæti kr. 44.872 án VSK
Eins og sjá má er verulegur munur á tilboðum, bæði hvað varðar verð og mögulega útfærslu þjónustunnar, sem kallaði á nánara mat á hagkvæmni og gæðum tilboðanna áður en ákvörðun er tekin.
Styrkfjárhæðin fyrir flugleiðina (F1) Reykjavík – Hornafjörður – Reykjavík nemur kr. 1.259.700.000 fyrir heildarverkið, sem spannar þrjú ár. Gert er ráð fyrir að flognar verði fimm ferðir í viku, sem jafngildir um 370 sæta framboði á viku hverri. Þetta fyrirkomulag er talið geta tryggt stöðuga og áreiðanlega þjónustu fyrir farþega á svæðinu, þó að tíðni ferða sé lægri en áður.
Samningstíminn er þrjú ár og gildir frá 1. september á þessu ári til og með 31. ágúst 2028. Samkvæmt samningsskilmálum er heimild til framlengingar um eitt ár í senn, að hámarki tvö ár, að uppfylltum ákveðnum skilyrðum og með samþykki beggja aðila.
Þrátt fyrir að færri ferðir verði farnar en áður, eða fimm í stað átta á viku, er gert ráð fyrir auknu sætaframboði. Ástæðan er sú að notaðar verða stærri flugvélar af gerðinni DHC-8-200 (Dash-8), sem taka allt að 37 farþega. Með þessari breytingu er leitast við að bæta nýtingu, auka skilvirkni og mæta betur eftirspurn farþega, án þess að auka rekstrarkostnað umfram það sem nauðsynlegt er.
Bogi Nils Bogason, forstjóri Icelandair:
„Við erum spennt fyrir því að bæta Höfn í Hornafirði við leiðakerfi okkar innanlands. Flugleiðin er mikilvæg fyrir íbúa á Suðausturlandi en einnig teljum við tækifæri fólgin í því að fá þennan vinsæla áfangastað ferðamanna inn í sölu- og dreifikerfi okkar og gera hann aðgengilegan viðskiptavinum í Evrópu og Norður-Ameríku. Jafnframt munu farþegar til og frá Höfn nú geta nýtt sér öfluga þjónustu Icelandair, þar með talið stafræna þjónustu og vildarklúbb.“
Bergþóra Þorkelsdóttir, forstjóri Vegagerðarinnar:
„Það er okkur mikil ánægja að ganga frá samningi um þessa mikilvægu flugleið við Icelandair, öflugt og reynslumikið flugfélag með traustan rekstrargrunn. Það skiptir miklu máli að geta tryggt flugið til Hornafjarðar til næstu ára.“
Flugvél Icelandair sem notuð verður í flugi til Hafnar í Hornafirði.