9. október 2025Rannsóknaráðstefna Vegagerðarinnar 7. nóvember
Rannsóknaráðstefna Vegagerðarinnar 7. nóvember
Rannsóknaráðstefna Vegagerðarinnar 2025 verður haldin í 24. sinn föstudaginn 7. nóvember á Hilton Reykjavík Nordica, Suðurlandsbraut, kl. 09.00-16.30. Dagskráin er fjölbreytt og endurspeglar það hið margháttaða rannsókna- og þróunarstarf sem styrkt er af rannsóknasjóði Vegagerðarinnar.
Almenn skráning – smelltu á hlekkinn
Fimmtán rannsóknarverkefni verða til umfjöllunar. Samhliða kynningu á þessum verkefnum verður einnig veggspjaldasýning.
Ráðstefnan hefur alla jafna verið fjölsótt af starfsfólki Vegagerðarinnar, starfsfólki ráðgjafa- og verkfræðistofa, verktaka og almenns áhugafólks um samgöngur og rannsóknir. Í fyrra sóttu ráðstefnuna hátt í 300 manns.
Á ráðstefnunni í ár verður mest fjallað um rannsóknir sem fengu fjárveitingar úr rannsóknasjóði Vegagerðarinnar árið 2024.
Styrkur rannsóknasjóðs Vegagerðarinnar liggur í því að styrkja verkefni á mjög breiðu fræðasviði þar sem ekki er endilega einblínt á hefðbundna vegagerð. Verkefnin falla þó undir fjóra almenna flokka sem eru: mannvirki, umferð, umhverfi og samfélag.
Ráðstefnustjóri verður Hólmfríður Bjarnadóttir, forstöðukona umhverfis- og sjálfbærnideildar Vegagerðarinnar.
Rannsóknaráðstefna Vegagerðarinnar 2025 - Dagskrá.