24. september 2026Opið hús hjá Vegagerðinni í Fellabæ
Vegagerðin býður til opins húss í endurnýjuðum húsakynnum þjónustustöðvarinnar í Fellabæ fimmtudaginn 1. október kl. 17:00. Öll eru velkomin og verður boðið upp á veitingar.
Þjónustustöð Vegagerðarinnar í Fellabæ.
Undanfarið hefur verið unnið að umfangsmiklum endurbótum á þjónustustöð Vegagerðarinnar í Fellabæ. Starfsaðstaðan hefur verið bætt til muna og húsnæðið er nú betur í stakk búið til að þjóna starfsemi Vegagerðarinnar á Austurlandi.
Í tilefni af verklokum verður húsið opnað gestum og gefst þeim tækifæri til að skoða endurnýjað húsnæðið og kynnast starfsemi Vegagerðarinnar á svæðinu.
Við athöfnina flytja fulltrúar Vegagerðarinnar, sveitarfélagsins og verktaka stutt ávörp. Einnig verður boðið upp á skemmtiatriði og veitingar.
Yngri gestir ættu einnig að finna eitthvað við sitt hæfi en bílar og tæki Vegagerðarinnar verða til sýnis og börnum gefst kostur á að setjast upp í þau og skoða.
Endurbætur á þjónustustöðinni eru liður í uppbyggingu Vegagerðarinnar á Austurlandi. Markmiðið er meðal annars að skapa góða og nútímalega starfsaðstöðu fyrir starfsfólk þjónustustöðvarinnar og aðra starfsmenn Vegagerðarinnar sem starfa eða hafa viðveru á svæðinu.
Opið hús verður í þjónustustöð Vegagerðarinnar í Fellabæ, Smiðjuseli 1, fimmtudaginn 1. október kl. 17:00. Öll eru hjartanlega velkomin.