30. janúar 2026

Losuðu stíflu í Bæjarósi

Að sögn Rúnars Sigurðssonar, yfirverkstjóra á þjónustustöð Vegagerðarinnar á Höfn, gerist þetta að jafnaði um það bil einu sinni á ári. „Núna hefur þetta hins vegar gerst tvisvar á tveimur mánuðum,“ segir hann.

Starfsmenn Vegagerðarinnar fylgjast grannt með aðstæðum við ósinn og þekkja vel merkin þegar hann stíflast. „Við sjáum það oftast strax, því þá er ákveðinn klettur sem breytist í eyju. Þá vitum við að við þurfum að kalla út verktaka til að losa stífluna,“ útskýrir Rúnar.

Stíflan var síðast losuð á Þorláksmessu, en Bæjarós hélst aðeins opinn fram að bóndadegi. Þá tók aftur að flæða að veginum og var verktaki kallaður út að nýju. Verkefnið felst í því að aka gröfu frá Hvalnesi meðfram fjörunni, um 14 kílómetra leið, að ósnum vestan megin við lónið. Þar er grafinn skurður til að hleypa vatninu út, en slíkt þarf að gera á háflóði til að tryggja sem best streymi.

Rúnar segir verktakann reyndar hafa nokkuð gaman af verkefninu. „Þetta er eins og stór sandkassi,“ segir hann brosandi, en áréttar jafnframt að starfsmaður frá Vegagerðinni sé alltaf á staðnum enda ekki óhætt að vera einn á ferð við þessar aðstæður.

Engar skemmdir hafa orðið á veginum vegna sjógangs að sögn Rúnars. „Við leggjum áherslu á að grípa til aðgerða áður en vatnið hækkar of mikið. Aðal hættan skapast ef þetta gerist í frosti og hvassviðri. Þá getur ísinn skemmt vegrið og jafnframt er hætta á að klaki eða krapi berist inn á veginn.“

Myndirnar sem fylgja fréttinni eru teknar af Þorleifi Olsen, starfsmanni á þjónustustöð Vegagerðarinnar á Höfn.