20. apríl 2026Lokun á Flóttamannavegi vegna framkvæmda
Loka þarf kafla á Flóttamannavegi (410) frá og með mánudeginum 20. apríl til föstudagsins 15. maí vegna framkvæmda við nýtt hringtorg á mótum Flóttamannavegar og Urriðaholtsstrætis svo unnt sé að ljúka framkvæmdunum á öruggan hátt fyrir sumarið. Sunnanmegin verður lokað við Kaldárselsveg og norðanmegin verður lokað við afleggjarann að Heiðmörk.
Ekki verður hægt að aka í gegnum svæðið á meðan lokunin stendur yfir sem þýðir að ekki verður unnt að aka þessa leið milli Garðabæjar og Hafnarfjarðar.
Af þessum sökum verður aðkoma að Urriðavelli í gegnum Holtsveg í Urriðaholti. Ekki verður hægt að aka Flóttamannaveg frá Hafnarfirði né Vífilstöðum til að komast að golfsvæðinu á meðan framkvæmdir standa yfir. Fólk er beðið um að sýna sérstaka aðgát og aka varlega um hverfið meðan á lokuninni stendur.
Auk hringtorgsins er unnið að vegtengingum og göngustígum, en framkvæmdir þessar munu bæta umferðaröryggi og ekki síst bæta aðgengi fyrir Urriðaholtið.
Hjáleiðir verða merktar og upplýsingaskilti sett upp við Kaldárselsveg og Vífilsstaðaveg.
Rauða línan sýnir framkvæmdasvæðið. Rauðu punktarnir sýna lokanir.
Hér sjást hjáleiðir.
Unnið er við nýtt hringtorg.