4. nóvember 2026Grjót fór í gegnum nýjar hrunvarnir við Holtsnúp
Stór steinn fór í gegnum nýuppsettar hrunvarnir meðfram Hringveginum við Holtsnúp undir Eyjafjöllum í morgun. Steinninn braut sér leið í gegnum grjótgrindurnar og olli töluverðum skemmdum á þeim.
Skemmdir á hrunvörn við Holtsnúp. Mynd: Aðsend
Hrunvarnirnar voru nýlega settar upp á um 300 metra kafla þar sem mikil hætta er á grjóthruni. Tilgangur þeirra er að auka öryggi vegfarenda á þessum stað.
Áætlað er að steinninn sé um tíu tonn að þyngd og því mun stærri en algengast er að hrynji úr fjallinu. Við hönnun varnanna var miðað við steina á bilinu þrjú til fjögur tonn. Steinninn er jafnframt mun stærri en sá sem olli banaslysi á þessum stað í mars 2025.
Vegagerðin lítur atvikið alvarlegum augum og er að skoða skemmdirnar. Gatinu í veggnum verður lokað til bráðabirgða og í framhaldi verður metið hvað þarf að gera til að tryggja öryggi vegfarenda.
