15. janúar 2026

Fram­kvæmd­um við Arnar­nesveg miðar vel áfram

Þessa dagana er unnið að frágangi nýrrar brúar yfir Breiðholtsbraut, sem var steypt í byrjun nóvember. Nú stendur yfir vinna við að fjarlægja undirslátt af akbraut til norðurs, sem hefur verið lokuð frá því í sumar á meðan framkvæmdir hafa staðið yfir. Ráðgert er að færa umferð yfir á akbrautina um næstu mánaðarmót og við það verður hæðartakmörkunum aflétt, sem mun bæta umferðarflæði á svæðinu.

Samhliða því stendur yfir vinna við undirslátt nýju göngubrúarinnar yfir Arnarnesveg, sem er staðsett á móts við Turnahvarf. Sú brú er mikilvægur hluti framkvæmdarinnar og mun bæta aðgengi og öryggi gangandi og hjólandi vegfarenda á svæðinu. Áætlað er að steypa brúna fyrir páska, að því gefnu að veður og aðstæður verði hagstæð.

Ný undirgöng úr forsteyptum einingum 

Ný undirgöng, sem eru í byggingu undir Arnarnesveg við Rjúpnaveg, eru að hluta til gerð úr forsteyptum einingum. Þær eru komnar á sinn stað og er nú unnið við frágang þeirra og uppslátt fyrir stoðveggjum sem munu koma við enda undirganganna.  

Í vegstæði Arnarnesvegar, milli Breiðholtsbrautar og Rjúpnavegs, er unnið við fyllingar og frágang ofanvatnslagna. Við göngu- og hjólastíg, sem verið er að leggja austan við veginn, er unnið við uppsetningu ljósastaura og frágangi á burðarlagi undir malbik. 

Brúin yfir Dimmu opin

Fjölmörgum lykilverkefnum er þegar lokið. Helst ber að nefna nýja göngu- og hjólabrú yfir Dimmu sem er tilbúin og hefur þegar verið tekin í notkun. Nokkrir kaflar á Breiðholtsbraut hafa verið malbikaðir, sem og göngu– og hjólastígar í Elliðaárdal.  

Laus jarðefni sem til falla vegna framkvæmdanna hafa verið flutt í Vetrargarð Reykjavíkurborgar. Vetrargarðurinn er í uppbyggingu þar sem skíðabrekkan er við Jafnasel. Einnig hefur verið sáð í stærstan hluta svæðisins.  

 Áætlað er að framkvæmdum við Arnarnesveg og tengd verkefni ljúki í nóvember 2026. Arnarnesvegur, 3. áfangi, er hluti af stofnvegaverkefnum sem heyra undir Samgöngusáttmálann. 

Ljósmyndir / Vilhelm Gunnarsson