Mannauðs- og jafnréttisstefna Vegagerðarinnar

Útgáfudagur: 14.10.2026

Tilgangur

Mannauðs- og jafnréttisstefna Vegagerðarinnar byggir á heildarstefnu stofnunarinnar og gildum hennar: fagmennska, öryggi, framsýni og þjónusta. Mannauðsstjóri ber ábyrgð á framgangi mannauðs- og jafnréttismála. Framkvæmdastjórn ber ábyrgð á að stefnunni sé framfylgt innan sviða og svæða.

Mannauðs- og jafnréttisstefnan er útfærð með stefnumiðuðum verkefnum sem eru metin reglulega með gögnum og skilgreindum mælikvörðum.

Leiðarljós

Öflugt starfsfólk, góð stjórnun og inngildandi vinnustaðamenning eru lykilforsendur þess að Vegagerðin nái markmiðum sínum og geti sinnt hlutverki sínu. Við viljum efla starfsfólk til góðra verka, laða að og halda í hæft starfsfólk og skapa eftirsóttan vinnustað með áhugaverðum verkefnum um allt land, öflugri liðsheild, jákvæðri menningu og jöfnum tækifærum.

1. Fólk og framtíðarhæfni

1. Við horfum til framtíðarþarfa starfseminnar og leggjum áherslu á fjölbreyttan mannauð, þar sem fagmennska og jafnræði ríkja í ráðningarferlinu.
2. Við tryggjum að laus störf henti öllum kynjum og við ráðningar er horft til hæfni, reynslu, vaxtarmöguleika og getu til að takast á við síbreytilegt starfsumhverfi.
3. Við leitumst við að skapa tækifæri til fjölbreyttra starfa og starfsþróunar á starfsstöðvum um land allt.
4. Við tökum vel á móti nýju starfsfólk og yfirfærum þekkingu við starfslok til að styðja við samfellu og þróun starfseminnar.

2. Jafnrétti

1. Við tryggjum að laun og starfskjör byggist á málefnalegum forsendum og að jöfn laun séu greidd fyrir sömu eða jafnverðmæt störf.
2. Ákvarðanir um ráðningar, laun, starfskjör og starfsþróun byggjast á faglegum og starfstengdum sjónarmiðum.
3. Við tryggjum jafna meðferð og jöfn tækifæri í starfi, og að allt starfsfólk eigi jafna möguleika á að njóta hæfileika sinna og þróast í starfi.
4. Við fylgjumst reglulega með stöðu jafnréttis, launum og starfskjörum og bregðumst við ef ómálefnalegur munur eða hindranir koma í ljós.

3. Starfsþróun og árangur

1. Við styðjum við símenntun og leggjum áherslu á að starfsfólk hafi tækifæri til að vaxa í starfi og tileinka sér nýja þekkingu og hæfni í takt við breytingar í starfsemi, tækni og samfélagi.
2. Fræðsla og þjálfun byggir á þarfagreiningu og árangur hennar er metinn með þátttöku, endurgjöf og áhrifum á starfsemi og starfsumhverfi.
3. Starfsfólk fær skýrar væntingar, reglulega endurgjöf og stuðning til að ná árangri og þróast í starfi.
4. Við hvetjum til þekkingarmiðlunar, nýsköpunar og stöðugra umbóta í starfi.

4. Öryggi, heilbrigði og velsæld

1. Öryggi starfsfólks er í fyrirrúmi.
2. Mismunun, einelti, kynbundið ofbeldi, kynbundin áreitni, kynferðisleg áreitni og annað ofbeldi verður ekki liðið. Við leggjum áherslu á forvarnir, öruggar tilkynningarleiðir og fagleg og skjót viðbrögð.
3. Við leggjum áherslu á heilbrigt og öruggt vinnuumhverfi þar sem samskipti eru jákvæð, uppbyggjandi og stuðla að árangursríku samstarfi. Starfsaðstæður og aðbúnaður stuðlar að öryggi, heilbrigði og vellíðan starfsfólks.
4. Við styðjum við jafnvægi milli vinnu og einkalífs með sveigjanleika í vinnufyrirkomulagi og möguleika til fjarvinnu, þar sem því verður við komið.
5. Við byggjum upp vinnustaðamenningu sem einkennist af virðingu, trausti, inngildingu og góðu samstarfi þar sem allt starfsfólk getur lagt sitt af mörkum og blómstrað í starfi.
6. Öll berum við ábyrgð á að sýna virðingu í samskiptum, stuðla að góðri vinnustaðamenningu og bregðast við óviðeigandi hegðun.

5. Góð stjórnun

1. Stjórnendur gegna lykilhlutverki í að framfylgja mannauðs- og jafnréttisstefnu.
2. Stjórnendur byggja upp traust og samvinnu, eiga reglulegt samtal við starfsfólk og stuðla að öruggu og jákvæðu starfsumhverfi.
3. Stjórnendur fá þjálfun og stuðning til að efla leiðtogahæfni sína, leiða breytingar og vinna að mannauðs- og jafnréttismálum með faglegum hætti.
4. Við leggjum áherslu á skýra ábyrgð, virka eftirfylgni og stöðugar umbætur í stjórnun og starfsumhverfi.