Aðeins dregur úr hraða umferðaraukningar, en samt met
Umferðin eykst en ekki jafn hratt
Umferðin á Hringvegi í nýliðnum apríl jókst um 1,8 prósent sem er heldur minni aukning en mánuðina þar á undan. Eigi að síður hefur aldrei mælst meiri umferð á Hringveginum í aprílmánuði. Frá áramótum hefur umferðin aukist um nærri sjö prósent sem er mikil aukning.
Milli mánaða 2023 og 2023
Eftir mikla aukningu umferðar, þrjá fyrstu mánuði ársins,
reyndist aukningin í apríl ,,aðeins“ 1,8%, miðað við sama mánuð á síðasta ári fyrir
16 lykilteljara á Hringvegi. Umferðin jókst einungis í tveimur svæðum eða
Suðurlandi og í grennd við höfuðborgarsvæðið, en dróst talsvert saman á öðrum
svæðum. Þessi aukning dugði þó til að setja nýtt umferðarmet í apríl
mánuði fyrir umrædda lykilteljara. Alls fóru daglega um 92 þúsund ökutæki
um lykilsniðin 16 miðað við rétt rúmlega 90 þúsund á síðasta ári. Rétt að benda á að sama
ökutæki getur mælst í fleiri en einu sniði.
8,3% aukning mældist yfir teljara við höfuðborgarsvæðið en umferðin dróst hins vegar saman um heil 17% á Norðurlandi, miðað við sama mánuð á síðasta ári.
Ein skýring á þessum mikla samdrætti á Vesturlandi til Austurlands kann að vera sú að færðin var töluvert verri í nýliðnum apríl miðað við sama mánuð á síðasta ári á þessum svæðum.
Þróun umferðar frá áramótum
Núna hefur umferðin aukist um 6,6% frá áramótum, miðað við sama
tímabil á síðasta ári. Þó að þetta sé talsverð aukning hafði umferðin aukist
tvöfalt meira á sama tíma á síðasta ári.
Umferð eftir vikudögum
Það sem af er ári er mest ekið á föstudögum en minnst á
laugardögum. Umferð hefur aukist mest á sunnudögum en minnst á
fimmtudögum.
Horfur út árið 2024
Þrátt fyrir frekar hógværa aukningu umferðar í apríl spáir
reiknilíkan umferðar um 7,5% aukningu nú í ár. Að teknu tilliti til
hagvaxtarpár Seðlabankans o.fl. Er það mat umferðardeildar að það sé ekki innistæða fyrir
svo mikilli aukningu umferðar nú í ár. Sumarmánuðirnir munu hins vegar
ráða mestu um það hvert muni stefna.
