Umferðartölur vegakerfisins á korti
nú má sjá nýjustu umferðartölurnar hverju sinni á korti
Vegagerðin hefur útbúið og sett út á vef sinn kort með umferðartölum á öllu vegakerfinu. Hægt er að sjá hver meðalumferðin er á skilgreindum vegköflum allt árið, eða um sumar eða vetur. Kortið er í mismunandi litum eftir umferðarþunga og því fljótlegt að sjá hvar mest er ekið.
Þegar kortið er opnað má strax smella á vegkafla til að fá upp upplýsingar um meðaltalsumferðina á þeim kafla, svo kallaða ársdagsumferð eða ÁDU, og einnig meðaltalsumferðina um sumar og vetur eða SDU og VDU á þeim kafla. Einnig kemur upp heiti vegarins, vegnúmer og upphafs- og endastöð. Þysja má inn í kortin til að sjá nánar vegakerfið og þá koma sjálfkrafa upp tölur um ársdagsumferðina. Einnig má velja þekjur með yfirboði vegar og örnefnum auk þess að hafa mismunandi grunnkort.