Samdráttur í júlí en töluvert meiri umferð en í júní

umferðin í júlí var 3,4 prósentum minni en fyrir ári en 13 prósent meiri en í júní

4.8.2020

Umferðin á Hringveginum í nýliðnum júlímánuði dróst saman um 3,4 prósent frá sama mánuði fyrir ári síðan. Umferðin var eigi að síður 13 prósentum meiri í júlí en hún var í nýliðnum júnímánuði. Líklega munar mestu um aukinn sumarfrísakstur landsmanna en einnig hefur ferðamönnum fjölgað og þar með umferð þeirra á vegunum. Útlit er fyrir að gríðarlegur samdráttur verði í ár og gæti hann numið 10 prósentum þegar upp er staðið.

Milli mánaða 2019 og 2020
Íslendingar hafa greinilega tekið vel við sér í akstri í júlí mánuði því umferðin varð 13% meiri en í mánuðinum á undan (júní) en þessi aukning dugði þó ekki til þess að umferðin í júlí yrði meiri en í sama mánuði á síðasta ári. Umferðin varð 3,4% undir því sem hún var í júlí 2019.  Umferðin dróst saman á öllum landssvæðum en mestur reyndist samdrátturinn á Austurlandi eða 8,3% en minnst dróst umferðin saman í lykilsniðum í grennd á og við höfuðborgarsvæðið eða um 0,9%.  Þess ber þó að geta að umferðin í nýliðnum júlí reyndist á pari við júlí 2017.

Af einstaka mælistöðum er það að frétta að bara einn staður reyndist með meiri umferð nú í júlí miðað við sama mánuð á síðasta ári en það var umferðin um sniðið á Hellisheiði, en aukningin var ekki mikil eða 0,4%.  Mestur samdráttur mældist í sniði á Mývatnsheiði eða 26,3%.

Frá áramótum
Nú hefur umferð dregist saman um 12,1% frá áramótum miðað við sama tímabil á síðasta ári.  Þetta er lang mesti samdráttur sem mælst hefur miðað við árstíma, eða tvöfalt meiri en hann hefur áður mælst sem var á milli áranna 2010 og 2011 en þá hafði umferð dregist saman um 6,2% frá áramótum á sama tíma.

Mest hefur umferð dregist saman um Austurland eða um 25,8% en minnst á og við höfuðborgarsvæðið eða um 5,8%. 

Umferð vikudaga
Umferð hefur dregist saman í öllum vikudögum, frá áramótum, miðað við sama tímabil á síðasta ári en mest á sunnudögum eða um 17,1% en minnst á þriðjudögum eða um 11,3%.

Horfur út árið
Ekki er búist við því að umferð aukist í neinum mánuði það sem eftir er ársins borið saman við síðasta ár, því gæti umferðin dregist saman um 10%.  Gangi þetta eftir yrði það lang mesti samdráttur sem mælst hefur, frá því að þessi samantekt hófst, eða tvöfalt meiri en áður hefur mælst í þessum sniðum.