Örlítil aukning umferðar í febrúar
á Hringveginum við höfuðborgarsvæðið
Umferðin á Hringveginum jókst lítillega eða um 0,4 prósent í febrúar. Aukningin var einungis við höfuðborgarsvæðið en samdráttur varð allsstaðar annarsstaðar. Frá áramótum er samdráttur í umferðinni sem nemur um þremur prósentum og hefur ekki verið meiri síðan árið 2012.
Milli
mánaða 2019 og 2020
Þrátt fyrir
rysjótt veðurfar, í nýliðnum febrúar, jókst umferðin lítillega borið saman við
sama mánuð á síðasta ári eða um 0,4%. Þessi heildaraukning er þó eingöngu borin uppi af aukningu sem varð á og við höfuðborgarsvæðið.
Umferðin jókst um 5,7%, sem verður að teljast umtalsvert, á því landssvæði en
dróst saman á öllum öðrum svæðum. Mest dróst umferðin saman á Norðurlandi eða um rúmlega 10%, miðað við sama mánuð á síðasta ári.
Frá
áramótum
Nú hefur
umferðin dregist að jafnaði saman um 3% frá áramótum borið saman við sama
tímabil á síðasta ári. Leita þarf aftur til ársins 2012 til að finna
meiri samdrátt í umferð, í umræddum sniðum, miðað við árstíma.
Umferðin hefur dregist saman á öllum landssvæðum að undanskildum mælisniðum á og í kringum höfuðborgarsvæðið en þar hefur umferðin aukist um 0,7%. Mest hefur umferðin dregist saman á Norðurlandi eða um 11,4%.
Umferð
eftir vikudögum
Það sem af
er ári hefur umferðin einungis aukist á mánudögum og þriðjudögum en dregist
saman alla hina vikudagana. Hlutfallslega hefur umferðin aukist mest á
þriðjudögum eða um 5,2% en dregist mest saman á föstudögum eða um 11,8%.
Föstudagar eru umferðarmestu dagarnir en ekki eins afgerandi stærri en hinir
vikudagarnir þegar miðað er við síðasta ár. Venjulega eru þriðjudagar
umferðarminnstir en nú ber svo við að bæði laugardagar og sunnudagar eru minni
og laugardagar minnstir.
